Ki mat byrngem bad kynthoh ka sorkar kan ïaid shakhmat ban trei ban rat dyngkong ïa u drok : Paul

Shillong, Risaw 5 : U Myntri ka tnad Social Welfare uba dei ruh u Nongpathai khubor jongka sorkar u bah Paul Lyngdoh mynta ka sngi u la ther kylla ïa ka Hynniewtrep Youth Council (HYC) kaba byrngem ban ïakhih paidbah lada ka sorkar kam pyntreikam ïa ki 7 tylli ki mat ba ka la buh hakhmat ka sorkar.
Haba ïakren bad ki lad pathai khubor mynta ka sngi u bah Paul u la ong “ Ai kin byrngem, kin kynthoh ki don ka hok ba laitluid kam pher kam lei lei namar ka sorkar ka pyrshang ban leh ïa kaba bha tam na ka bynta ban ïakhun pyrshah ban rat dyngkong ïa u drok na ka jylla. Namar lada kim kynthoh pyrshah ïa ka sorkar ruh ki lah ban shu jah rngai noh kumta ka kam jongki ka dei beit tang ban kynthoh pyrshah sorkar. Ai kin ïai bteng ban kynthoh hynrei ngi ruh ngin ïaid shakhmat ban trei la ka kam haduh ban da jop”.
U la ong shuh shuh “ Ka sorkar ka la leh la ka kam bad ka dei ruh ka sien kaba nyngkong eh ba la lah ban pynngat ïa ki nongkhai drok ha ka kyndon aiñ Prevention of Illicit Traffic in Narcotics Drugs and Psychotropic Substance (PITNDPS) Act, 1988” bad ban set along ïa ki.
Lah ban pynkynmaw ba kane ka kyndon aiñ ruh ka treikam ha kane ka jylla hadien ba u bah Paul u la shimti kum u Myntri ka tnad Social Welfare bad ka thong ka long ba da kane ka kyndon aiñ yn lah ban pynngat kyndon ïa kiba khaïi ne ki nongpynpoi ïa u drok shapoh ka jylla.
Ka HYC ha ka Sngi Thohdieng ka la phah ïa ka shithi sha u Myntri Rangbah u Conrad K Sangma bad dawa ba ka sorkar ka dei ban pyntreikam ïa ki hynñiew tylli ki mat jingdawa. Kine ki 7 tylli ki mat jingdawa ki kynthup ïa ka treatment & rehabilitation, free detoxification, OST and day-care centres ha baroh ki District kiba jyllei droks, ban pynkhlaiñ ïa ki ïing Bishar Fast Track/Special Court ïa ki case hapoh ka NDPS Act, 1985, ban pynkhlaiñ ïa ki buit ïakhun pyrshah ïa ka jingkhaïi droks bad ban pynkha ïa ka Ophis jong ka Narcotics Control Bureau ha Shillong.
ïa kane ka rai la shim hadien ka jingïalang bala pynlong bad ki Nongïalam Shnong bapher bapher, ki Rangbah Shnong, ki Seng Longkmie, Seng Samla bad ki riew paidbah myn ha ka 28 tarik Nailur. Kane ka jingïalang kala rai ban pynsdang ïa ka mishon bala tip kum ka Drugs Elimination and Enforcement of DREAM (DEED) Mission.
U President ka HYC u bah Roykupar Synrem ula ong “Ngi kyrmen bad kyntu ïa ka Sorkar Jylla ban pdiang bad mynjur ïa ki jingdawa ba shonghok jong ka seng jong ngi naka bynta ka bha ka miat ki nongshong shnong ka Jylla baroh kawei. Namar lada ym shimkhia ka Sorkar ban leh eiei hapoh ka por kaba biang ïa kine ki jingdawa jong ngi, ngin sa pynsdang ïa ka jingiakhih paidbah ban pynthikna ba ka Ssorkar kan shim khia”.
U President ka HYC ula ong ba ka Sorkar Jylla kala pynsdang ïa ka Drug Reduction, Elimination, and Action Mission (DREAM) ha ka 27 tarik Jylliew 2023 da ka jingthmu ban pynkylla ïa ka Jylla kum ka “Meghalaya kaba lait na u droks”.
“Ka dei ka policy kaba biang bha, ym don jingartatien ïa kata, da ka thong ban ratdyngkhong ïaka jingdih droks bad wanrah ïa ka imlang sahlang kaba lait na une u jingdih pynbuaid, kaba ngi baroh ngi angnud bha. Hynrei kaei kaba pynsngewkhia ïa ngi ka long ba kane ka Mission/Policy kala kylla long ruh kum kiwei ki kot ki sla jong ka Sorkar kaba shu itynnad tang ha ki kot ki sla hynrei kam long kaba lah ban pyntreikam kumba angnud. Namar kata, khnang ban kynjoh ïa ki kyndon jong ka DREAM, ngi kwah ban dawa ïa ka jingleh eiei noh kyrkieh halor kine ki 7 tylli ki mat” ong u Bah Roykupar ha ka shithi.
Haba batai bniah ïa kine ki mat, une u Nongialam ka HYC ula ong ba ha Meghalaya, ki don 10 tylli ki Rehabilitation Centre kiba treikam, kiba la bei tyngka da ka Ministry of Social Justice & Empowerment (MOSIE), ka Sorkar India, ba kyrshan ka Sorkar Jylla lane ba pynïaid shimet. Ka jingshim briew jong kine ki centre ka long kumba 300 ngut ki nongpang katba ka jingdon ki nongdih droks ha Jylla kala kot ïa kumba 3 lak ngut kaba long kat kum ka jingkren u Myntri ha ka Dorbar synrai ba dang shu kut ka ïingdorbar Thaw Aiñ. Mynta, ka jingkylli ka mih ba nangno kiwei pat ki nongdih droks kin ïoh jingsumar?.
Ula ong ruh ba kat kum ki mat ha ka DREAM Document bala pyllait da ka Sorkar Jylla bad haba peit ïa ka jingdon ki nongdih droks ha ki District kiba la jyllei u droks, kala nang kiew na ka sngi sha ka sngi, ka long kaba kongsan ba ka dei ban don noh ka Detoxification, OST and Day Care Centres ban ai jingshakri ei sha ki briew bala kyrni ïa ka jingdih droks ha baroh kine ki District.