Shillong, Risaw 05: U Lat jylla u CH Vijayshankar ha ka sngi Saitjaiñ u la plie ïa ka 2nd edition jong ka Shillong Book Fair, ba la pynlong da ka National Book Trust, India.
Ïa kane ka book fair kaba 9 sngi kan kut haduh ka 13 tarik u Risaw 2024 kaba la pynlong ha State Central Library Shillong.
U Lat ka jylla u la pynpaw ka jingkmen ïa kane ka tamasa kaba dei shaphang ka jingshemphang na ka bynta ka jingmyntoi jong ki samla ka Shillong.
Haba kren ha ka sngi plie, u Bah F.R. Kharkongor, IAS, Principal Secretary, ka tnat Arts and Culture, ka sorkar Meghalaya u la ïaroh ïa kiba la wan ban ïashim bynta wat hadpeng ka jingjur jong u slap bad ong ba kane ka jingïashim bynta ka sakhi ba ki dei ki riew kiba ieid ïa ki kot. Haba ai khublei ïa ka National Book Trust India ba la jied ïa ka Shillong kum ka jaka na ka bynta ka 2024 chapter na ka bynta ka book fair, u la ong, “Ngi kyrmen ba kane ka book fair kan ïarap ban kyntiew ïa ka kam pule puthi ha ka jylla.”
U la kyntu ïa ki samla pule ba ki kot kin ïarap ïa ki ban kiew shajrong khlem jingtieng. “Long ki nongpule bad long ki nongïalam,” u la ong.
Haba ai khublei ïa ka sorkar jylla bad ka State Education Department ba ka la kyrshan ïa kane ka book fair, u Yuvraj Malik, Director National Book Trust India u la ong ba ki kot ki dei ki bynta ba pdeng jong kano kano ka jingshemphang.
U Malik haba kren sha ki khynnah skul kiba don ha U Soso Tham Auditorium, u la kyntu ïa ki ban kin long ki ambassador jong ka book fair bad kum ka pateng ka ban wan, ban long ki heh ki haiñ ha ki snem ban wan da ka bor jong ka jingnang jingtip bad kane kan long tang lada ki long kiba smat ban pule ïa ki kot ki sla ha ka jingim jong kiba manla ka sngi.
“Ka long kaba ai mynsiem ba kum kane ka prokram ka la wan ha Shillong. Ki kot ki dei kiei kiei kiba batai shaphang u briew,” ong u Vijay Kumar Mantri, Commissioner & Secretary, Education, uba phai sha ki kot kum ka jingpule ban sngap naba kane ka thaw ïa ka dur ha ka jingmut jingpyrkhat”.
Kiwei kiwei ki heh ki haiñ kiba la donlang ki long u Swapnil Tembe, Director, Dept. of Education, Govt. of Meghalaya; bad DD Shira, Director, Dept. of Arts & Culture, Govt. of Meghalaya.
Wat la ïa kane ka book fair la plie hapdeng ka jingjur jong u slap, ka jingwan ban ïa shim bynta shitrhem jong ki khynnah skul ha ka sngi kaba nyngkong ka long kaba la pdiang sngewbha. Palat 300 ngut ki samla pule najan palat 10 tylli ki skul ki la wan sha kane ka jaka ba la pynlong ïa kane ka Fair. Ha ka sngi ba plie ka la don ka drawing competition bad ka orientation session halor ka Rashtriya e-Pustakalaya. Ka topic na ka bynta ka drawing competition ka dei ‘My City, My Shillong’ bad ka ‘When I Grow Up’.
Ki la don ruh ki cultural programmes ba la pyni da ka Geetanjali Dance School da ki samla pule jong ka Monica Chanda bad Snam Rangsa Band.
