Shillong, Risaw 05: Ka khubor ba la ïoh na ki pulit la ïathuh ba u Coy Commander, G-Coy, ka 100th Bn., BSF, BOP Kuludhar (WGH) u la phah ka jingujor ba ha ka 2 tarik mynta u bnai ha ka por kumba 3.15 baje mynstep, ki shipai BSF ki la ïoh bat ïa 5 ngut ki nong Bangladesh kiba la ithuh kyrteng da u Md. Rubel @ Robin ba la 31 snem ka rta, u Md Rabbi @ Rubbi Haldar ba la 26 snem ka rta, u Md Habib ba la 24 snem ka rta, u Md Amdadul Haque ba la 36 snem ka rta bad u Mashuk Malla ba la 48 snem ka rta, katba ki dang pyrshang ban rung beaiñ shapoh u pud u sam jong ka ri India kaba hab hapoh ka BOP Chichengpara
Ha kawei pat ka jingjia u nongshong jong ka West Garo Hills u la phah ka jingujor ba uwei u Askar Ali u la thok ïa u ka pisa kumba T. 1,17,24,000/-, da kaba leh mynleh ba u dei u nongshong shnong ka Meghalaya uba la ïoh bor napoh ka Nayara Energy Ltd., da kaba ïoh laisen napoh ka GHADC ban shna ïa ka petrol pump ha Garobadha, West Garo Hills (WGH). Utei uba la ujor u la ïathuh shuh shuh ba ha ka 8 tarik bad 15 tarik u Nailur, 2024, utei uba la shah kynnoh ha ryngkat ba ka kurim jong u bad u khun ki la byrngem ïa u.
Ha kawei pat ka jingjia ka khubor ba la ïoh na ki pulit la ïathuh ba ka Rebina Sangma ka la phah ka jingujor ba ha ka 3 tarik mynta u bnai ha ka por kumba 3 baje mynstep, u la shem ba kumba 4 tylli ki masi ki la jah napoh ka sem masi jong ka kaba ha shnong Agonggitim (SWGH).
