Shillong, Risaw 05: Ka Meghalaya Police ka la lah ban pynliem noh ïa ka Smit SC da 2-1 kol ha ka jingïalehkai ba khadduh na ka Group A jong ka lympung phutbol kyrdan Second Division 2024 ba la pynïaid da ka Shillong Sports Association ha madan SSA Ground, Polo ha ka sngi Thohdieng.
Da kane ka namjop ka MLP ka la pynkut kum ka lahduh jong ka Group da kaba bat kyrdan ba nyngkong, ka kyrdan ba ka la bat naduh ba sdang ki jingïalehkai Group stage, katba ka jingkyrmen jong ka Smit ban jam sha ka wat ïakhun semi final ka la pulom naba ka la wan ha ka kyrdan ba lai na kane ka Group, kaba mut ba ka jingïaid lynti jong ka ha kane ka lympung ka la poi sha kaba kut.
Kumban shu kdew, shuwa kane ka jingïakhun, ka Smit ka donkam tang ban ïakhaid ban khur ïa ka shi point khnang ban ïoh bat ïa ka kyrdan ba ar ban jam sha ka wat ïakhun semifinal.
Haba phai sha ka jingïakhun, ym shym la don satia ba pynkhihjar ha ka kylla step, kaba la kut da 0-0 kol, hynrei tang mar ïa sdang shi minit ka kylla kaba ar u Austin Marbaniang (46′ minit) u la pynkhih ïa ka kol kaba nyngkong, hadien nangta u Chesterfield Nongdhar (71′ minit) u la thep ïa ka kol kaba bud kaba la pynlong ïa ka MLP ban lamkhmat da 2-0 kol ha ka por ba sah satang 20 minit duna shuwa ban wai.
Ka Smit ka la ïakhun dohïap ban pynurlong ïa ki kabu ksiar jong ka pyrshah ïa ka MLP hynrei ka la ïohlad ban pynphai tang shi kol, kaba la thep da u Rishanlang Suting ha ka 90’+2 minit.
