Nongpoh, Risaw 04: Ka Ri-Bhoi Youth Federation hadien ka jingleit kynduh ïa ka MS ka Nongpoh Civil Hospital bad ka jingkhia ka jingtreikam ha katei ka Hospital ka la dawa na ka sorkar jylla bad u Myntri Rangbah ka jylla u Conrad K Sangma ban pynsted noh ïa ka jingplie ïa ka Maternity and Child Hospital kaba don ha Umran Parila.
U Bah Bipul Thangkhiew u la ong ba kum ka seng ka dap da ka jingsngewkhia halor ka jingpynslem ka sorkar ban plie ïa katei ka jaka sumar na ka bynta ki longkmie ba kha khyllung kaba la dep lut ban shna nadong shadong naduh ki building, namar ka jingplie ïa katei ka jaka ai jingsumar kan long ka jingkyrkhu ïa ki paidbah ka dong Ri-bhoi khamtam ki longkmie ba armet bad kan pynsting ruh ïa ka Nongpoh Civil Hospital bad kiwei kiwei ki jaka ai jingsumar ha ka district.
