Shah jied ka Simi Khongtiang bad Elvachisa Sangma ha ka Busan International Film Festival ha South Korea
Shillong, Risaw, 03: Ka Kong Simi Khongtiang, ka nongpynmih ïa ki phlim ha ka ktien Pnar na rilum Jaiñtia bad ka Elvachisa Sangma na Tura ki la shah jied ban leit ïashim bynta ha ka Busan International Film Festival, 2024 kaba la sdang naduh ka 2 tarik mynta u bnai bad ka ban kut haduh ka 11 tarik mynta u bnai ha ka nongbah Busan, South Korea.
Ka Fraternity Art Cine Entertainment, Shillong ka la pynpaw ruh ïa ka jingsngewnguh ïa ka Ministry of Information and Broadcasting, ka Sorkar India, kaba la jied ïa ki nongshna phlim na ki jylla jong ka thaiñ Shatei Lammihngi ban ïashim bynta ha ka Busan International Film Festival kaba pawnam ha ka dewbah Asia.
Ïa kine ki arngut ki nongshna phlim la jied da ka Directorate of Information and Public Relations (DIPR), ka Sorkar Meghalaya. Ka jingshah jied jong ka Kong Simi Khongtiang ka long namar ka jingïoh jingithuh halor u synñiang u bynhei ba ka la noh sha u sup u thiar ban pynmih ïa ki phlim na rilum Jaiñtia katba ka Elvachisa Sangma ka dei ruh ka nongshna phlim ba la ïoh pdiang ïa ka khusnam bad kaba la ïoh jingithuh ha ka Mumbai International Film Festival (MIFF).
Ka Ministry of Information and Broadcasting ka la shah bynshet ban jied arngut ki nongshna phlim ba pawkhmat na ka thaiñ shatei lammihngi, ha kaba kawei kan dei ka nongshna phlim ba dang kham khynnah bad kawei pat kan dei kaba la ïoh pdiang khusnam na ka rynsan National Films Awards (NFA), ka International Film Festival of India (IFFI) lane na ka Mumbai International Film Festival (MIFF). Ïa ka jingjied ba khatduh la aiti haduh ka 25 tarik, Naiwieng, 2024, kaba pynthikna ïa ka jingmihkhmat jong ki nongshna phlim na ka thaiñ Shatei Lammihngi ha ka tamasa.
Kum ka jingkyrshan ïa kane ka kynhun ba la mihkhmat ïa ka ri India, ka National Film Development Corporation (NFDC) kan bei lut ïa baroh ki jinglut jingsep, kynthup ïa ka bai liengsuiñ bad ka bai sah na ka bynta san sngi ha kane ka tamasa, khlem da kheiñ ïa ki sngi leit jingleit.
Ka Fraternity Art Cine Entertainment (FACE) ka la ai jingïaroh ïa ka jingpyrshang jong ka Ministry kaba long kum ka jingkyrshan bad ka jingkyntiew ïa ka jingthmu kaba kongsan bha ban kyntiew ïa ki nongshna phlim na ka thaiñ Shatei Lam Mihngi bad ban ïarap ïa ki ban ïoh ïa ka jingmut nabar ka ri.
Ka jingïashim bynta ha ka tamasa phlim ha Busan kan ailad kyrpang ïa ki nongshna phlim ban pyni ïa ki sap jong ki hakhmat ka pyrthei khnang ba kin dup ïoh ïa ka jingïasam jingtip bad ka jingïatreilang bathymmai.
Ka Busan International Film Festival, kawei na ki rynsan pyni phlim ba pawnam ha dewbah Asia, kan ailad ruh ïa ki nongshna phlim kum ka Kong Simi Khongtiang bad ïa ka Elvachisa Sangma ryngkat bad kiwei de na kane ka thaiñ ban pynpaw ïa ka jingpher bad ka buit shna phlim na ka thaiñ Shatei Lammihngi sha ki paidbah nongpeitkai na kylleng ka pyrthei.