Jowai, Risaw 03: Ka Shnong Bataw kaba hap hapoh ka Wapung Block East Jaiñtia Hills District Khliehriat, hynnin ka sngi kala rakhe ïa ka sngi kha u kpa ka ri India u Mahatma Gandhi da kaba pynlong ïa ka jingpynkhuid Shnong ha kylleng ki bynta jong ka shnong.
Kila don haduh 9 tylli ki Dong kiba la ïamih paidbah ban pynkhuid ïa ki lynti ki synkieng, ki umbam umdih bad kiwei de ki bynta hapoh ka Shnong.
U Waheh Shnong Ma Deihok Sumer haka jingleit sakhi ban ïadon bynta lang ha kane ka jingpynkhuid Shnong ha ryngakt ki nongkitkam shnong, kila buh ka jingkyntu ïa ki paidbah nongshong shnong ba kin don ka jingïatylli ha kano kano ka kam da kaba sdang shwa napoh ka shnong.
La ai jinghikai ïa ki nongshong shnong ba kin tip kumno ban long kiba leh khuid bad kiba nang ban pynlum pynlang ïa ki ñuit ki ñier tang shi jaka, ka Shnong Bataw ka don ka jingkyrmen skhem ban pynlong ïa ka shnong kum kawei na ki Model Village hapoh ka Wapung Block.
Kum ka dak ban ai mynsiem ïa ka jingtreishitom jong ki Dong ha ka jinglehkhuid la sam kumjuh ïa ka khusnam ba nyngkong sha ka Dong Border bad ka Dong Umtlooh kiba la ïoh mar Rs.3,000 tyngka, ba ar la ïoh da ka Dong Knia-Murit bad ba lai la ïoh da ka Dong Lyngken Suwe bad ka Dong Umstyndong ryngkat ka song pisa kaba mar Rs.1000/-, la sam ruh ïa ki khusnam Consolation Prize sha kiwei de ki 4 tylli ki Dong kaba mar Rs.500/- tyngka.
