SHILLONG, Risaw 03: Ka Jongksha SC ka la ïoh ban khur pura ïa ki lai point hadien ba pynliem ïa ka Lumshyiap SC da 7-3 kol ha ka lympung lehkai kyrdan Second Division 2024 jong ka Shillong Sports Association ba la long ha ka Sngi Palei (03.10.2024) ha SSA Ground, Polo.
Ar ngut ki rangïalehkai ka Jongksha ki la ïoh ban pynkhihjar mar ar kol, kine ki long u Basuklang Bina (25 bad ha ka 54minit), nangta u Donboklang Lyngdoh (45+1 bad ha ka 83 minit), katba u Robert Khongjoh (33’), u Pyniaidlang Songthiang (35’) bad u Liberius Mynsong (43’) ki la ïoh ban thep mar kawei.
Na ka liang jong ka Lumshyiap SC ka la ïoh ban pynphai ar kol lyngba u Arky Kharmalki (46 min), Firstborn ïawphniaw (73min) bad na u Banbishar Mawlong (90+2min).
Shuwa kane, ka jingïakhun kaba nyngkong hapdeng ka Nongkrem SC pyrshah ïa ka Mylliem Lum SA ka la jam sha kaba kut, ha kaba ka Nongkrem ka la khur ïa ka jingjop da 2-1 kol.
Ka Nongkrem SC ka la ïoh ban lamkhmat shi kol ha ka kylla step lyngba u Sawadame A Tang (45 min), nangta pynbud ïa ka kol kaba ar ha ka kylla miet lyngba u Wilbert Marbaniang (84min). Shuwa ban kut ka por, ka Mylliem Lum SA ka la ïoh ban pynphai shi kol lyngba u Eliastar Nongsiej (90+5min).
Ka jingïalehkai SSA 2nd Division 2024 ha kane ka sngi Thohdieng (04.10.2024) kan long ha ka por 2:45 baje nohphaisngi. ha SSA Ground, Polo, ha kaba ka MLP FT kan ïakhun pyrshah ïa ka Smit SC.
