Nongpoh, Risaw 01: Ka ophis District Programme Officer, ICDS, East Khasi Hills & Ri Bhoi District haka 30 tarik Nailur ka la ioh ban pynkut noh ïa ka Rashtriya Poshan Maah progamme ba la pynlong ha Lawbyrwa Aganwadi Centre, Ri Bhoi district.
Ha kane ka sngi la ioh ruh ban plie paidbah ïa ka Saksham Anganwadi Centre ba la wan ban plie paidbah da u Bah A.L Myrthong BDO jong ka Umsning C&RD Block kum u kongsan, ha ka jingdon ryngkat ki ophisar bad ki nongtrei na ki tnad sorkar bapher bapher ba kynthup ïa ka tnad ka koit ka khiah, Horticulture, MSRLS bad kiwei kiwei.
Ha kane ka sngi la ioh ruh ban pynkup burom ïa ki nongïaleh sports kiba la wanrah nam bad burom ïa ka District bad kumjuh ruh ïa ki nongtrei jong ka Anganwadi.
Haba ai jingkren ha kane ka sngi na ka liang u Bah A.L Myrthong u la ai ka jingkhublei ïa ka tnad ICDS ka ba la lah ban pynioh ïa katei ka Aganwadi Centre kaba donkam eh na ka bynta ki nongshong shnong kaba dei shibynta jong ka roi ka par bad ka bha ka miat jong ka shnong khamtam eh ïa ki khynnah rit bad kumjuh ruh ïa ki longkmie kiba la ioh ia ki jingbam lyngba katei ka Centre.
