Nongpoh, Nailur 29: Ha kawei na ka jingjia ïa tyngkhun Kali, uwei u Dirbar ka Auto Rickshaw u la mynsaw, kaba dei hadien ba katei ka Auto Rickshaw kaba u niah ka la shah tynrah ha kawei ka Kali Swift kaba la jia hynnin ka miet sngi Saitjain ha Dulongnar ba hap ha ka surok National Highway-6 ha Ri Bhoi.
Kane ka jingjia ka la jia ha ka por 10.30 baje mynmiet ha ka miet sngi Saitjain ha kaba ka Auto Rickshaw kaba don ïa u number ML 10 A 9158 bad la niah da u Medinstar Warjri (52) na ka shnong Jyntru ka la shah tynrah ha katei ka Kali Swift kaba don ïa u number ML 05 S 9159 bad ba la niah da u Phrang Lyngdoh Nongbet na Lad Mawreng East Khasi Hills, kaba dei ka jingpynher palat jong u ïa ka kali kaba um lah shuh ban tehlakam haduh ban da leit tynrah kynsan syndon ïa kane ka kali Auto Rickshaw.
Kumba la ioh lum jingtip, la ong ba u Dribar katei ka Auto Rickshaw u la mynsaw bad la rah noh ïa u mar mar da ka Ambulance 108 sha Civil Hospital Nongpoh ban ioh ïa ka jingsumar. Ha kane ka jingjia, katei ka Kali Swift bad ka Auto Rickshaw ki la julor na ka daw ka jingïatynrah ha katei ka surokbah.
Shuh shuh, la ong ruh hadien ba la sumar da ki Doctor la pyntip ba utei u Dribar ka Auto Rickshaw u la shu mynsaw malu mala bad ïa kitei ki Kali pat la rah lang baroh ar tylli sha Nongpoh Police Station ban dang pynlong ïa ka jingtohkit kaba kham bniah, ong ka tyllong khubor na ki Pulit ka Ri Bhoi.
