Ha ka sien ba 31 pynlong ka JFE&PA ïa ka jingïakob khwai dohkha ha Wah Myntdu

Jowai, Nailur 29: Ka jingïakop khwai Dohkha ne ka Fishing Competition kaba la pynlong da ka Jaiñtia Fishing & Environment Protection Association (JFEPA), ha kane ka sngi saitjaiñ 28.09.2024, ka la long kaba ïaid beit ïaid ryntih, ka seng lyngba ka mynsiem ba don ka jingïada ïa ki doh um doh wah kala pynlong ïa kane ka Fishing Competition kaba la long ka sien kaba 31 mynta u snem.
Ha kane ka jingïakop khwai dohkha bun ki rawon ki la wan ban ïashim bynta ha kane ka jingiakop khwai dohkha.
U Womlin Pakyntien u ba long uwei na ki dkhot jong ka Association, u la ïathuh ïa ka jingshah pynjot ki dohum dohwah ha ka wah Myntdu, ha kaba u la ong bun ki briew ba shim kabu ban pynduh jait ïa ki dohum bad da ka jingdon jong ka Association kine ki nongshim kabu ki jah noh. Na ka liang jong u ma Pakynteiñ u la kyntu ruh ïa ki samla ban pynrung ïalade sha kane ka Association na ka bynta ban ïadon kti lang ha ka ban ïada ïa ki donum doh wah.
Ki nongjop ha kane ka jingïakop ki long kumne; Ha ka liang ki Dohkha Pnar ïaka 1st Prize la ïoh rah da u Charemiki Passah, 2nd Prize da u Silverstar Kyndiah bad ïa ka 3rd Prize da u Lambha Gatphoh. Ha ka liang ki Dohkha Dkhar ïa ka 1st Prize la ïoh rah da u Owaker Paswet, ïa ka 2nd Prize da u Rang Challam bad ïa ka 3rd Prize la ïoh da u Deimaya Shullai.
Ïa ki khusnam la sam da u President ka JFEPA ma D.H. Pde ryngkat ki dkhot ka JFEPA ha ka jingïadonlang kiwei de ki riew rangbah.