HT Wells
Hapdeng ka jingsngewklumar jingmut jong ki paidbah ka jylla halor kata ka jingthmu wan ïalap ban khang bam doh masi jong ki shongshit niam Hindu hapoh kata ka shatri Gau Dhwaj Sthapana Bharat Yatra ka long pynban kumba theh umpjah ïa ki nong Meghalaya haba u Conrad K. Sangma u la kren sha ki lad pathai khubor ha ka 25.06.24, hana ba u la shaniah beit ha ka Deputy Commissioner ban rai la yn ai ne yn nym ai permission ïa ka jingthmu jong u riewkhuid ki Hindu u Jagat Guru Shankaracharya Shri Swami Swaroopanand Ji Maharaj ban wan ïalap ha ka nongbah Shillong ha ka 2th October 2024 kaba dei ruh ka sngi kha jong u Mahatma Gandhi ne kata ka Gandhi Jayanti, kumba ki la pynbna paidbah.
Ha ka jingshisha, um dei shuh ban tieng ne khaweit ban rai syndon da ka Cabinet kumba leh kiwei pat ki jylla ha kane thaiñ Northeast khamtam haba ki arngut ki Minister jong u, kata u Rakkam Sangma bad ka Dr. Mazel Ampareen Lyngdoh ryngkat bad u CEM KHADC bad kiwei pat ki riewpawkhmat naduh ki nongthoh haduh ki nonghikai ki la pyrshah jur ïa kane ka jingthmu ban khanglad ïa ka jingbam doh jong ngi hangne. Hangne, phin ïohi ïa ka jingshalak buit tuh jong une u Chief Minister jong ngi, um ju kren nyngkong da lade haba don kano kano ka mat kaba ktah ïa ka jaidbynriew, hynrei un pyntur nyngkong da ki Deputy CM jong u bad u sa polish hadien ynda la kham thynda, kata ka jia naduh Covid-19 haduh ki mat jingïakhih ba mehding jong ki sengbhalang ne ki nonghikai.
Ha kawei pat ka liang, kaei kaba sngewtynnad ban tip ka long ba uta u riewkhuid Shankacharya u la hap ban leit phai biang sha ka jaka ba u wan, khlem da ïohlad ban ïalap paidbah ha Arunachal Pradesh bad ha Nagaland mynta ka sngi 26.09.24, hynrei u hap ban leit phai noh tang na Airport hi. U Polan John, Deputy Commissioner Chumoukedima, Nagaland u la leit da lade sha Dimapur Airport ban pynshai ïa utei u riewniam Hindu ba ka Sorkar Nagaland kam shah ba un wan ïalap khang bam doh masi, namar ladep ban rai da ka Cabinet jong u Nephiu Rio, CM Nagaland. U Bah Ardent M Basaïawmoit leader VPP mynta ka sngi Palei u la ther tyngeh ïa u Conrad Sangma ha ka jingïalang paidbah ba u CM jong ngi u hap ban pyndem tdong ha ka BJP u Modi. Dei namarkata ka daw um nud ban shim rai kumba rai rangbah da ki Chief Minister jong kitei ki artylli ki jylla ba marjan jong ngi, watla ki dei kiba ïasynrop lang bad ka BJP. Lada ïa ka bit ka biang (interest) jong ki paidbah ka jylla la khein synrum tang ban biang ka jingïadei shimet ha Delhi, te ka la bakla shaba palat. Ki paidbah ki dei ban buh da u dak jingkylli uba heh ïa kane ka sokar MDA ba la lamkhmat da u Conrad Sangma. Kito ki Cabinet minister jong u kiba kren sha ki lad pathai khubor ha kine ki taiew ba la leit ban pyrshah ïa katei ka mat, kin shu kbum la ka kbum noh tang namar ba u Boss jong ki um sngewtynnad ban pynsngewsih ïa u Modi uba la thmu ban pynlong Hindurashtra ïa ka India? Kum kine ki nongïalam shano ngin poi, kin dei tang ki khlein la thang bad jwat la bam, haba ka manifesto ba ki khlei ka long ban ïada ka ki Hok longtrai jong ngi katba ki kam jong ki pat ki long da kumwei.
Lada kitei ki heh Hindu ki wan na ka bynta ban ïalap ïa ka shongsuk shongsaiñ ne ïa ka roi ka par, nga ngeit ki paidbah ka jylla bad ka NE India kim don ei ei ban pyrshah hynrei kine ki briew ki leh jemnud kum ki paro bad sianti kum ki bsein, ki wan ban pyntreikam ïa kaei kaba ka Sangh Parivaar ka la passed da ki phew snem mynta da ka jingkynshoit jong ka RSS bad kiwei ki tnat Hindu, kata ka long ban iuhroit ïa ka Secularism ne ka jingmane Blei ne jingim ba laitluid jong ki nongshong shnong ka India. Ki la pun lypa mynta kumba u nongthoh u la dep kdew ha ki article ba shakhmat lyngba ki seminar, ki symposium ne ki conclave ba laiphew jait jong ki. Kin pynbieit da kaba pynkam Kmie jubor ïa ka Masi bud sa ka jingkhein sang ban bam doh masi bad kumta ter ter. Ka buit ba na sha lyndet ka long kaba shyrkhei, namar ka Sangh Parivaar ka ïohi ïa kane ka thaiñ kum shrah ba ba seisoh na ka bynta ka Hinduism. Utei u riewniam uba la hap ban leit phai noh mynne, u la kren bynniaw da kaba ong ba nga ladep buh programme ban leit ïalap khang bam doh masi sha baroh 33 tylli ki jylla ka ri hynrei kumno kumne!
Nga sngewkmen shibun ba uwei na ki Retired Judge jong ka Supreme Court, Justice Markandeya Katju ha ka 16.09.2024, u la rkhie bein ïa ka jingngeit jong ki Hindu, hana ba ka masi ka dei ka kmie kaba khuid. U la kylli, kumno ka masi kan long ka kmie jong u, ka dei tang ka jingpyrkhat jong ki riewdum khlem pule. Ka masi ka dei tang ka mraw saw kjat, naduh ba phah thoh essay ha ki klass rit ngi la tip ïa kata, ka long hi kum u ksew ne kulai bad kiwei pat ki mrad. Utei u Riewsaid-Aiñ u kyntu ïa ki nongïalap ban khang bam doh masi ban pyndonkam ïa ka bor pyrkhat jong ki ym ban shu shu kren pathar ba dei ban tieng-burom (revered) ïa ka masi kum ka kmie. U la ong shuh shuh, phi la kylla long ka jingshahrkhie beiñ ïalade hakhmat ka pyrthei baroh kawei, kiba bam doh masi, kiba mutdur ba ki nong India ki dei tang kiba khleh bieij bad ki riewdum, la pynkut nia utei u riewstad. (A cow is an animal, like horse, dog etc. He advises propagators of beef ban to use their intelligence and not go ballistic over revering the cow as mother. You are making mockery of yourself across the world as they think Indians are stupid as beef is consumed around the world).
Shuh shuh ban wan ïalap masi hangne ha ngi, ka pyntheh umpjah pynban ym tang ïa ki khristan kiba bam doh bha hynrei wat ïa ki Niamtre (indigenous faith) kiba dang knia masi kumba leh ka Raij Mynso ha ka 17.09.2024 myn ha kane ha kaba ki knia da ka masi kum kawei na ki jinglehniam ba donkam bha jong ki. Ngi dang kynmaw ruh ba u Mohan Bhagwat u heh duh ka Rashtriya Swayamsewak Sangh (RSS) u wan iuhkjat ha u Lum Sohpetbneng bad ha Shillong dei tang khyndiat sngi hadien ba ka Raij Ïalong ruh ka dep ban knia masi.
Te balei kine shongshit niam Hindu kiba pyrta ba kin pynneh ïa ka deiti ne jingmane blei tynrai jong ka Ri, ki wan ban iuhroit pynban ïa ka jingleh niam jong ki briew jong ngi hangne. U Chief Minister Conrad K. Sangma um lah ban shu thet kti kumba leh u Pantious Pilate ïa u Jisu Khrist hakhmat u paidbah, namar ka dei ka kam ïap kam im jong ki nongshong shnong jong kane ka jylla kaba lah ban ktah ïa ka Food Habits jong ki bad ïa kiwei pat ki kam, suki pa suki. Ka sorkar kam dei ban long kum ka Lymbit ka shu shad shane bad shatai haba ka i ba ka mat treikam ka long kaba mynsaw.