Nongstoiñ, Nailur, 26: Ka Voice of the Peoples Party (VPP) kan da tohkit bniah ïa uwei pa uwei ne kawei pa kawei kiba pan tiket ban ïaleh ïa ka elekshon MDC na ka Party. Ïa kane la ïathuh da u President ka VPP u Bah Ardent Miller Basaïawmoit haba kren ha ka jingïalang ai khublei jong ka party ha Rambrai ha ka sngi Palei.
Ha kane ka jingïalang wat hapdeng ka jingter jong u slap, ki paidbah ki la ïeng shitom harud surok da kaba kup ïa ki shatri bad rieh slap ha ki dukan ban sngap ïa ki jingkren jong u Bah Ardent bad u Bah Powell Sohkhlet uba long u Organising Secretary jong ka VPP Mawthadraishan.
Ha kaba ïadei bad ka jingai tiket ban ïakhun ïa ka elekshon MDC, u Bah Ardent u la ong wat lada ki la bun ki jingpynsngew na kiba bun ki liang, hynrei ka party ka don ka State Election Committee ka ban peit bad ka ban shim ïa ka rai. Tangba shuwa ban rai kan don ka jingtohkit kaba bniah ïa baroh ki kyrtong.
Kane ka long hadien ba uwei na kiba pan tiket na Rambrai Jyrngam Constituency u Bah Sromwell Mawdoh u la mih noh na ka party mynta la palat shi bnai bad kynthoh bad beiñ pat ïa ka Party hadien ba imat u sngewthuh ba un ym ïoh ticket.
Une ujuh u rangbah u la shah kem noh ha ki Pulit jong ka Ribhoi District ha kine ki khyndiat sngi ba ladep halor ka jingkynnoh ba u ïadon kti bad ka seng kieng atiar Hynñiewtrep National Liberation Council (HNLC). Ka HNLC ka la kyntait ïa ka jingkynnoh jong ki Pulit da kaba ong ba u Bah Srom u la shah kem kum u dkhot ka HNLC ha ki Pulit ha u snem 2015.
U Bah Ardent u la ther ïa u Bah Sromwel da kaba ïathuh ba une u rangbah hadien ba u la rung sha ka party bad siew ruh ïa ka bai rung dkhot kum u Active Member 150 tyngka hynrei ha ka por ba u la mih noh na ka party u la pan noh ruh ïa ka bai rung dkhot, kaba long ka jingleh ka bym ju kham jia koit ha kino kino ki party.
