Da ka phutbol angnud ban wanrah jingtylli ki 3 Raid ka thaiñ Umden, rah ka Raid Nongtluh ïaka nam lahduh

Nongpoh, Nailur 26: Shibynta ban wanrah ka jingïatylli ka jingïajan hapdeng 3 tylli ki Raid ba kynthup ïaka Raid Nongtluh, Raid Mathan bad ka Raid Marmaiñ, ka Nongtluh, Mathan & Marmaiñ Development Forum (NMMDF) mynta ka sngi kala pynlong da ka jingïalehkai phutbol ba shisngi hapdeng ka kynhun bala mihkhmat na kitei ki 3 tylli ki Raid ha Madan ïalehkai ha Umden.
Ïa katei ka jinglehkai phutbol la leit ban plie paidbah da u Bah MB Tongper ADC ka Ri Bhoi kum u kongsan haka por mynstep bad pynhap pyrda pat ïaka haka por janmiet da u Bah Mayral Born Syiem MLA ka Nongpoh haka jingdonlang u Raja Brahma ADC, ki nongïalam naki 3 tylli ki Raid, ki nongïalam jong ka NMMDF naduh u Bah Arnold Syngkli kum u Chairman, ki Rangbah Shnong bad kiwei kiwei ki riew rangbah.
U Bah Arnold Syngkli kum u nongïalam katei ka kynhun jong kitei ki 3 tylli ki Raid u la pynpaw ba ka thong hi ba hakhmat jong katei ka jinglehkai phutbol ka long ban wanrah ka jingïa ïeid ka jingïajan bad ka jingïatylli hapdeng ki nongïalam bad ki khun ki hajar jong kitei ki 3 tylli ki Raid, kumba katei ka Forum ka don ka jingangnud ban trei naka bynta ka bha ka miat jong ki khun ki hajar kitei ki 3 tylli ki Raid khamtam ban buddien ïaki kam pynroi kiba ka sorkar ka iehnoh beiñ ha katei ka thaiñ.
U Bah Mayral Born Syiem kum u kongsan haba kren ha katei ka sngi u la pynpaw ka jingsngewkmen ban iohi ba ki khun samla naki 3 tylli ki Raid kila shim bynta shitrhem haka jinglehkai phutbol naduh dangstep bad kane ka pyni ïaka jingtylli jong ki khun samla hapoh ka Raid.
U la ai mynsiem ruh ïa katei ka Forum ba kan dang kiew shaphrang ban trei naka bynta kaa bha ka miat jong ki paidbah namar katei ka Forum ka nim tang lada ki nongïalam bad ki khun ki hajar ki don ka jingïatylli, bad kiar naka jingbishni pihuiñ namar haba trei kano kano ka kam donkam ka jingïatylli bad ka jingsnohkti lang jong ki nongïalam bad ki paidbah.
Haba phai sha ka jingïalehkai phutbol kaba la pynïakhun ruh da ka League System, ka kynhun jong ka Raid Nongtluh kala ioh ban rah ïaka nam lahduh hadien ba kala lah ban pynliem noh ïaka Raid Mathan haka jingïakhun phainal da 1-0 kol.
Shuh shuh nalor katei ka jinglehkai phutbol la pynlong ruh ïaki prokram lehkmen bapher baapher naduh ka put ka tem, ka shad ka rwai bad kiwei kiwei ki jingpynbyrngia.