SHILLONG, Nailur 26: Ar tylli ki kynhun ba kynthup ïa ka Lumshyiap bad ka Nongkrem ki la khur pura ïa ki lai point hadien ba jop ha ki jingïalehkai ka lympung Second Division 2024 jong ka Shillong Sports Association ba la long ha ka Sngi Palei (26.09.2024) ha SSA Ground, Polo. Na ka liang jong ka Lumshyiap SC ka la lah ban pynliem ïa ka Laitlyngkot SC, katba ka Nongkrem SC ka la jop ïa ka Marbisu SC.
Ka shi kol na u Pynskhemlang Syiemleh ha ka minit ba 40 ka la biang pura ïa ka Lumshyiap SC ba kan pynliem ïa ka Laitlyngkot ha ka jingïakhun kaba nyngkong.
Katba ha ka jingïakhun kaba bud la sakhi ïa ka Nongkrem SC kaba la pynjemkhnap ïa ka Marbisu SC haduh 4 kol. U Willbert Marbaniang u khyrwit lai kol ban kynjoh hat trick lyngba ki kol ba la thep ha ka 18, 21 bad ha ka 57 minit, nangta u Jefferson Pakyntein (77 minit) u la ïoh ban thep kawei.
Ki jingïalehkai SSA 2nd DIVISION 2024 ha kane ka sngi Thohdieng (27.09.2024), ha ka por 12 baje ka Imson SC kan ïakhun pyrshah ïa ka Smit SC, nangta ha ka por 3 baje nohphaisngi ka Umphrup SC pyrshah ïa ka Laitkyrhong SC.
