Shillong, Nailur 24 : Kum shi bynta jong ka tamasa lehkmen Synrai, ban kyntiew ïa ka jingïalehkai Badminton bad ruh ïa ka koit ka khiah jong ki paidbah, na ka liang ka Shillong Badminton Coaching Centre ka pynlong ïa ka Shillong Autumn Badminton Open Challenge 2024 ha JN Indoor Sports Complex naduh 24 haduh ka 28tarik Nailur mynta u snem.
La plie ïa ka Tournament ha kane ka sngi Ba-ar da u General Secretary jong ka Meghalaya State Badminton Association bad la kyrshan ïa kane ka lympung ïalehkai da ka Meghalaya AIDS Control Society, Meghalaya Tourism, Wellness Club, Umroi bad kiwei de.
Ha kane ka lympung la pynbeit ba kan don ka jingïalehkai na ka bynta ki khynnah kynthei bad kumjuh na ka bynta ki khynnah shynrang hapoh ka rta ba 13 snem, 15 snem, 17 snem bad 19 snem. Baroh kiba shim bynta ki long 62ngut ki nongïalehkai ba don sap.
Ka kyrwoh ka ong ruh ba hadien kane, kata naduh ka 27 bad 28 tarik kin sa rung bad ïakhun sa ki nongïalehkai ha ka thup kiba 35 snem shajrong, 45 snem, 55 snem bad kumjuh ia kiba 60 snem shajrong.
La ïathuh ba ha kane ka thup ki don ruh ki nongïalehkai na nongbah Guwahati bad na kiwei dei ki jaka kylleng ka thain shatei lam mihngi kiban wan ban shim bynta lang.
