Jowai, Jylliew 02: Ka lympung ïalehkai Badminton jong ki khynnah skul kaba la tip kum ka ‘15th Inter School Badminton Tournament 2022’, ba la pynïaid da ka West Jaiñtia District Badminton Asso-ciation (WJDBA) Jowai ka la sdang noh hynnin ka sngi bad pynkut ha ka 4 tarik mynta hi u bnai ha Chutwakhu Indoor Sports Hall, Jowai.
Na ka liang u Chairman ka Tournament ma Teddy Laloo ula ïathuh baroh ki khynnah skul kiba wan sha kane lympung kila don haduh 138 ngut napdeng ki 16 tylli ki skul hapoh ka West Jaiñtia Hills District.
Ha kane ka sngi sdang la wan ban plie pyrda ïa ka da u kongsan ma J.M Pohsngap uba dei u President ka seng, u General Secretary ma M. Nongpluh, ha ryngkat ka jingdonlang jong ki member jong ka WJDBA ki nonghikai lem bad ki khynnah skul.
Ha kane ka jingïalehkai Badminton jong ki khynnah skul la pynbynta ha ki lai kyrdan kata ha ka Under-13, Under-15 bad ka Under-17 jong ki khynnah shynrang bad kynthei ha ka jing-ïakhun Single bad Double.
