Pyllait paidbah u Myntri Rangbah ïa ka GMCD Tool kaba ïadei bad ka jingsan ki khynnah

Shillong, Nailur 19: Kum shi bynta ban kyntiew ïa ka jingdonkam jong ki paidbah nongshong shnong u Myntri Rangbah ka jylla Conrad K Sangma ha ka sngi Palei, u la pyllait paidbah ïa ka ‘Guidelines for Monitoring Childhood Development (GMCD) Tool’ na ka bynta ka Early Childhood Development (ECD) ha ka jylla Meghalaya.
Ha kaba ïadei bad kane na ka liang jong u ha ka jingkren plie jong u, u Myntri Rangbah u la ong, “Nga sngew skhem ba kane ka sienjam kan long kaba jop namar nga lah ban sngew ïa ka jingsngew tynnat jong ki briew kiba don bynta ha kane ka kam kaba pynlong ïa ki ban leh ïa kane ka kam ba ki trei”.
“Nga kynmaw ha ka por ba nga dang leit sha Australia kum u MP ha u snem 2016 sha kawei ka Research Institute ha kaba nga la ïakynduh ïa uwei u Professor uba la leh ïa ka jingpule bniah shaphang ka China bad u la ong ba ki samla ka ri India ki lah ban long ka bor kaba khraw tam jong ka Ri ne ka jingeh kaba khraw tam. Nga sngewthuh ba ngi kum ka Ri bad kum ka jylla ngi donkam ban pynleit jingmut ha ka jingroi jong ki nongshong shnong jong ngi naduh ba ki dang kha haduh ki snem jong ka jinglong khynnah, samla, bad kiwei kiwei,” bynrap u Myntri Rangbah.
Shuh shuh haba kren shaphang kumno ka sorkar jylla ka la shim katto katne ki jingïarap ban pynleit jingmut ym tang ïa ki khunlung ba dang kha hynrei wat ïa ki kmie ruh kumjuh, u la ong, “Ka sorkar ka tip ba ngi hap ban leh eiei ban pynïasoh lang ïa ki tnad bad ki jingdon jingem bad sa sdang ïa ka kam. Haba shong bishar ïa ki jingkheiñ ha u snem 2018, nga sngewthuh ba ka jingïap jong ki kmie haba kha khun ka long kaba heh bha haba ïanujor bad ka jingkheiñ ha ka ri baroh kawei. Ngi dang pyrkhat ba dei ki jingkha khun ha ki jaka sumar ka long ka daw jong ka jingeh hynrei ngi la sngewthuh ba ka dei tang ka bynta jong ki jingeh ba kham heh. Da kaba pyrkhat ïa kane, ngi la sdang ban pynleit jingmut ha kaba lap kloi ïa ki longkmie kiba don ha ka jingma bad khatduh ngi la sdang ïa ka skhim Chief Minister’s Safe Motherhood Scheme (CM-SMS) ha u Lber 2022, kaba dei ka prokram ha Meghalaya kaba thmu ban pynduna ïa ka jingïap jong ki longkmie bad ki khunlung,” u la ong.
Ha kaba ïadei bad kine baroh, u Myntri Rangbah u la ong ba ka sorkar ka la sngewthuh ba lada ka jylla ka dei ban shim ïa ka bor jong ki pateng kiba dang wan, ka hap ban tuklar, kyrshan bad ïalam lynti ïa ki ha ka rukom kaba pura naduh ba sdang ka jingim jong ki haduh ba kin da san samla.
Na ka liang u Myntri Rangbah u la ong ruh ba namar ba kane ka prokram ka long kaba kongsan bha ha ka liang ka koit ka khiah, ha kaba kan donkam ban don ki kyndon ban buddien, pynbha bad pynthikna ïa ka jingroi jingsan baroh kawei jong ki samla nongshong shnong naduh ba dang kha bad kyntu ïa baroh ki kynhun ba don bynta ha ka kam, ba kin shim ïa ka jingkitkhlieh bad ban trei da ka jingsngew tynnat na ka bynta ka jingjop jong ka jingthmu.
Kiwei pat ki nongkren ki la kren halor ki bynta bapher bapher jong ka jingroi jingsan jong ki khynnah bad kumno ban kyrshan ïa ka jingroi jingpar jong ka jingmut jingpyrkhat bad ka bor pyrkhat jong ki khyllung ba dangkha khamtam haduh 3 snem ka rta. Ki jingbthah kin ïarap ban ai ïa ki rukom treikam ba thikna halor kane ka bynta.