Jowai, Nailur 19: Ka lympung ïalehkai phutbol bala tip kum ka “7th U Debo Shullai Memorial Trophy” jong ka kyrdan 2nd Division Football Tournament 2024 bala pynïaid daka West Jaiñtia District Sports Association (WJDSA) Jowai kaba la long ha kane ka Sngi Palei (19 tarik u Nailur) ha madan Kiang Nangbah Stadium Dongmihsngi, Jowai.
Ha ka jingïakhun kaba nyngkong ka Madankynsaw Mawkyndeng kala pynbam kput haduh 7-0 kol ïa ka Caroline. Ar ngut ki player ki la ïoh ban khyrwit hat trick, kine ki long u Cornelius Suchiang haka minit ba 5, 27 bad 71, u Dangri Phawa haka minit ba 37, 54 & 63, katba ka shi kol la thep da u Heiwamut Lamare haka minit ba 68.
Katba ha ka jingïakhun kaba ar ka Nangbah Dukhu kala pynliem da 3-1 kol ïa ka Dongmihsngi, ïa ki kol na ka Nangbah Dukhu la thep da u Banteilang Iongwai haka minit ba 40+1 bad u Nathan Biate haka minit ba 51 & 83. Ïa ka kol na ka Dongmihsngi la thep da u Remember Langstang haka minit ba 65.
