Shillong, Nailur, 17: Ka thma ktien hapdeng uwei u rangbah na ka thain Sohra bad ki nongkhaïi ha ka thain Majai ka la bteng biang halor ka jingkit palat pud bad ka jingïaid lait na ka Land Custom Station kaba don ha Majai.
Hadien ka jingmih ki nongkhaïi ha ka thain Majai ha ka 12 tarik mynta u bnai ban pynshai halor ka jingkynnoh pyrshah ïa ki, ha ka sngi Baar u Bah Wellborn Bynnud u la mih biang shakhmat ban takraiñ kylla ïa ki.
Ha ka jingïakren bad ki lad pathai khubor u Bah Wellborn Bynnud u la ong ba lada kita ki kynhun ki kam ba ki ïatrei tang para Khasi hynrei balei pat ki kali jong ki bar jylla ki dang ïaid bad nalor kata u la ong ruh ba ki bar jylla kiba leh ïa ka khaïi pateng ki dei ban da ïoh ïa ka Trading Licence.
Ha kane ka sngi, u Bah Bynnud u la pyni sakhi ruh da ki video ba la ringdur da kaba kynnoh ba ki trok kit maw kim ïaid shuh na ka Weightbridge haba leit kit maw sha Bangladesh.
U la ïathuh ba ki nongap khyrdop ha Weightbridge ki shu shong kai baroh shi sngi ha ka Weightbridge jong ka tnat Transports na ka daw ba ym don kawei ruh ka trok kit maw ka ban ïaid na kane ka khyrdop thew jong ka tnat Transports ka Sorkar Jylla.
U la ong ruh ba la bthah ïa ki trok ban kit tang 12 ton katkum ka hukum ba la pynmih da ka Sorkar khnang ba ka surok ba la maramot da ka Hima Sohra kan shan slem.
“Hynrei hapdeng ka jingleit jurip jong ngi, ngi la lap ba ki Exporter ki ïaleh pyrshah ha Majai ha kaba wat ïa ki kali kim shym la pynïaid shuh ïa ki Weightbridge,” u la ong bad bynrap, “ngi la leit ban ujor ha u Asst. Commissioner jong ka tnat Transports ban buh noh da ka CCTV ban pynthikna ba ki trok kit maw kiba leit sha Bangladesh ki dei ban kit tang hapoh 12 ton ym ban kit palat ïa kata.”
