Nongstoiñ, Nailur 17: U Deputy Commissioner ka West Khasi Hills District Bah Garod L.S.N. Dykes, IAS, u pynbna ba kino kino ki briew ne ki seng kiba thmu ban pynlong ïa ki jingïalang paidbah ne ki jingïalang kiba heh kiba don palat 100 ngut ki nongwan, ki dei ban pan jingbit shwa na ki bor synshar District.
Ki nongpynïaid ki dei ban pyntip lypa sha ka bor District ym duna ïa ka lai sngi shwa ka jingïalang, khnang ba ka bor District kan ïoh ban bthah ban pynbeit ïa ka jinglum ïa ki jaboh kiba mih na kita ki jingïalang paidbah.
Ha kajuh ka por, dei ban pynïakhlad bha ïa ki jaboh shuwa ban aiti sha ki nonglum jaboh ba la buh ne ka society ba la ithuh da kane ka ophis. Ïa kane ka jingpynbna la pynmih katkum ka jingbud ryntih ïa ka shithi No. MPCB/ TB-955/2019/2024-2024/304, dated 20th August, 2024.
Ha kawei pat ka bynta jong ka khubor, u Deputy Commissioner jong ka West Khasi Hills District u Bah Garod L.S.N Dykes, IAS, u pynbna ïa ka jingpynbna ba katkum ka Meghalaya Cyber Cafe Rules 2012, ba la pyntip hapoh ka Notification No ITR 49/2011/61 jong ka 17 tarik u Nailur 2012, baroh ki Cyber Cafe bad ki CSC kiba la don lypa ki dei ban pynrung kyrteng hapoh ka District Administration. Ka tarik ba khatduh ban pynrung kyrteng kan long ha ka 29 tarik u Naiwieng 2024.
Ïa ka jingpynrung kyrteng lah ban pyndep lyngba ka website http://www.megedistrict.gov.in. Ka jingbym kohnguh ïa ki kyndon ban pynrung kyrteng ka lah ban wanrah ïa ka jingpynshitom katkum ki kyndon jong ka Information Technology Act, 2000.
