Jowai, Nailur, 13: Ka Rotary Club Jowai (RCJ) RID3240 hynnin ka sngi Palei 12 tarik u Nailur, 2024 kala pynkup burom ïa ar ngut ki Nonghikai skul ka sor Jowai daka khusnam “Nation Building Award” haka jingïalang bala pynlong ha Infinity Moralong, Jowai.
Ha kane ka sngi la wan ban donlang naduh u A.G. Pradeep G. Pillai kum u kongsan uba dei ruh u Asst. Governor ka jylla, ki nongkitkam ka Rotary Club Jowai naduh u ma Rtn. S.K. Lato, ka Rtn. Easter Flora Gatphoh, Rtn. B.P Najiar, Rtn. M. Passah nalor kiwei de, ïa ka jingïalang la pynïaid da u President Rtn. Rudolf Eustace Laloo.
Kine ki ar ngut ki nonghikai skul kiba la shah pynkup burom ki long u ma Agate C. Chullai na ka Q.C Springside Higher Secondary School, Jowai bad u ma Dominic Phawa na ka Marian Hill H.S School, Jowai, kiba long ruh ki nonghikai kiba la synñiang jingïarap shibun eh haka liang ka jingnang jingstad jong ki khynnah skul.
U A.G. Pradeep G. Pillai haba ai jingkren kum u kongsan ula ong kaba donkam eh kum ki dkhot ka Rotary Club of Jowai ban don ka jingïatylli da kaba bteng ïa ki kam babha hapoh ka imlang ka sahlang lyngba ki project treikam bapher bapher bad ban trei ruh ïa kaba bha tam na ka bynta kiwei, khnang ba kan long kum ka ‘magic’ hadien bala dep trei ïaka kam.
Ha kajuh ka por u ai ruh ka jingïaroh ïa kitei ki 2 ngut ki Nonghikai kiba don ka mynsiem ban pynkiew shaphrang ïa ka lawei ki khynnah skul bad dei na kane ka daw kaba pynlong ïa ka Rotary Club Jowai ban pynkup burom ïa kitei ki nonghikai skul.
U la pynsngew ba ka Rotary Club kala don bynta lang ban rad diengkhong ïa ka jingpang Polio hapoh ka ri ka pyrthei naduh u snem 1975 bad dei lyngba kane ka kam ba bha jong ka Rotary kala ïoh jingshañiah na kiba bun ba lang. Na ka liang ka Rotary Club kan ïakhun katba lah ban pynkiew ïa ka jingnang jingstand hapoh ka Ri India. Shwa kane la don ka jingrwai ïa ka National Anthem bad la shim bynta lang da baroh, katba ïa ki kyntien ai khblei la ïoh na u Rtn. Ashish Kumar Singh.
