Nongstoiñ, Nailur 13: Ka surok na Nongstoiñ shaduh Sohpian kaba jngai tang kumba 7 kilomiter haduh ka National Highway 44(E) ka dei u budlum jong ka kit ka bam ka leit ka wan ym tang jong ki paitbah hynrei haduh ki Ophisar bad baroh ki nongtrei sorkar ha ki tnad trei kambapher bapher la ka dei ha Nongstoiñ kaba dei ka Headquarter jong ka District ne ha kiwei kiwei ki bynta kum ha Riangdo bad kiwei kiwei.
Hynrei haba peit ïa ka surok pat ka la pynlehraiñ haduh katta katta. Ka jingilehraiñ ka dei na ka jingrit palat, ka jingkylla thwei ha manla ki jaka kum ha shnong Pyndenglawar hajan ka Wine Store ba mynshuwa, ka jingbym don ki Muster Roll kiba pynkhuid ïa ki rud ki kiar nangta ka jingdon jong ki nongñiah kali kiba khlemakor bad ki bym kheiñ snep ïa kiwei wat ha ki jaka bakham kylluid ruh ki ïaid baheh beit ha kaba kiwei pat ki kali haba ïakynduh ki hap ban ryngkoh ruma sha ki thiew bad wat sha nala ruh tang ban lait ka aksident bad ka ïatim ïatla para nongñiah kali
Kaba lyngngoh ka long ba ha u snem ba ladep ki Muster Roll ki don manla ka sngi ha katei ka surok hynrei mynta u snem pat ki la jah rngai shei ym tip.
Dang ha kine ki bnai ba ladep ki don ki riew paitbah kiba ong ba ïa ki saw ngut ki Muster Roll kiba trei ha katei ka surok man ka sngi la phah noh ba kin trei ha ka National Highway naduh Sohpian ter ter shaphang sepngi .
Don pat kiba ong ba ki Muster Roll kim trei shuh ha katei ka surok namarba ka PWD kam ai tulop shuh ïa ki la bun bun bnai bad kitei ki jingong jong ki riewpaitbah ka lah ban long kaba shisha ne ka bym shisha ka PWD kan sa pynshai hi sha ki paitbah namar na ka jingsniew jong ka surok bad ka jingrit palat ka jingthnum na ki nongñah kali naduh ki kali shimet, ki kali kamai sor ba kynthup naduh ki Taxi, ki Tata Sumo, Max, haduh ki Local taxi ka jur bha kat haduh ba ki la ong ba katei ka surok kam don jingïapher shuh na ka lynti khlaw ba ïaid tang ki shynreh, ki kulai ki masi ki blang.
