Ka sorkar MDA ka dei ka ïing ba ïapait ïapra kan sa long kum u Humpty Dumpty : Pala

Shillong, Jylliew 1 : U President ka MPCC bad u MP ka Shillong Parliamentary Constituency u ma Vincent Pala ula ong ba ka sorkar Meghalaya Democratic Alliance (MDA) ka dei ka ïing kaba ïapait ïapra bad na kine ki jingpaw pyrthei ki kam bamsap bam phong jong kane ka sorkar ha kawei ka sngi kan sa long kum u Humpty Dumpty uba shu hap la ka hap hi jraiñ na kynroh.
Ha kaba ïadei bad kane ka jingïapait ïapra u ma Vincent u la pynpaw ba ka daw ka dei namar ka election MLA 2023. Namar ym dei tang ka BJP kaba ïai kren pyrshah sorkar hynrei wat ka UDP ruh ka la sdang ban kynthoh pyrshah ïa ka NPP bad ka NPP ruh mynta ka la ther kylla ïaka UDP kata ruh da ki jingïa tynrah kiba tyngeh bha.
“ Ki la sdang ban ïa kynnoh bad ïa kynthoh pyrshah para maki namar ki don katto katne na ki kiba ka mynsiem ïatip lem ka la ktah ïa ki ba ki sngewthuh ba ki la tuh bad la lute naphang ïa ki paidbah bad dei na kata ka daw ki paidbah ki sa jynjar sat haduh katne. Ki dei ban kynmaw pat ba la ka dei ka BJP, NPP ne UDP ruh kim dei ban ïasait khuid namar ki don ka jingkit khlieh lang ba ki ïadon lang ha ka sorkar MDA” ong u ma Pala.
U la ong kat shaba phai la ïohi tang ki jingïa kynnoh markylliang nalor ba ki ïadon hak a sorkar ka long thik kumba dung tari da lade ïa lade. Namar u bah Adelbert Nongrum uba dei u MLA ka KHNAM u don haka sorkar hynrei u kynthoh pat ïa ka MDA kaba dei ka metbah hato ym dei ba u dung tari ïalade. Nalor kata kumjuh ruh ka long ïa u bah Jemino Mawthoh Secretary ka UDP bad bah Bindo M Lanong Adviser katba u bah Metbah Lyngdoh President ka UDP bad Lamphang ka ïing Dorbar pat u pyrshang ban ïada rapjot ïaki. Nalor kata u bah A.L Hek na ka BJP ruh u kynthoh pyrshah sorkar katba u bah Sanbor u pyrshang ban ïada. Kane ka pyni ba ka sorkar MDA ka dei ka ïing kaba ïapait ïapra bha mynta. Ka daw tynrai baroh dei na ka pisa namar imat bym hun shuh ka jingïoh bhah sdang sa ka jingïakynnoh pyrshah.
Halor ka jingkynnoh pat ba kane ka sorkar kan long kum u Humpty Dumpty ba kan sa shu hap la ka hap hi na kynroh namar ba la jur ki kam bamsap, u ma Pala u la ong namar ba la jur palat ka jingïabam sap kane ka sorkar kan sa shu hap la ka hap hi namar ka election ruh ka la jan bad kan hap jraiñ kumba hap u Humpty Dumpty.
“ Namar ba ka NPP ka la bun palat ka pisa kumta kin pyrshang ban tan ïa kiwei na ka Congress bad wat na kiwei ki seng saiñ pyrthei ruh sha ka ktem jongki ban pyrshang katba lah ban kyrshan lang ïa u Humpty Dumpty ban ym hap, hynrei nga tharai ha u Nailur bad Risaw ki paidbah kin sa shai lut bad kin sa tip haduh katno ki la shah khniot ha kane ka sorkar bad kumta kane ka sorkar kan sa hap la ka hap hi jraiñ. Namar tang shu kut ka por treikam ka sorkar kata mar ïa pynbna ïaka Model Code ong Conduct tang kattta kane ka sorkar kan sa mad jingeh bad kan ym lah shuh ban tem ne ïakhun ïa ki paidbah” ong u ma Pala.
U ma Pala u la ong ïakane halor ka kaiphod ba la ai da u nongbishar ba la shongthait u Justice B.P Katakey sha ka ïing bishar High Court jongka jylla uba la pynpaw ba kane ka sorkar ka khlem pyntreikam ïa ki hukum bad jingbthah jongka ïing bishar Supreme Court (SC) bad National Green Tribunal (NGT). U la kynnoh ba ka sorkar ka khlem pyntreikam ïakine ki hukum namar ki sheptieng ïoh kim ïoh pisa shuh na surok. Namar kane ka sorkar ka sngewkmen ban ïoh lum pisa beaiñ na surok na u dewiong bad kiwei kiwei ki kam beaiñ. Ka kam beaiñ barobor ka long beaiñ.U nongleh beaiñ u ju ïarap mar kylliang ïa uwei pat u nongleh beaiñ”
“ Kumta ka sorkar kam kwah ban pynsangeh ïa kine ki jingïoh lum pisa beaiñ wat la ka ktah jur ïa ka ïarong tyngka jongka sorkar ruh namar ka pisa ba la lum beaiñ ka rung beit sha ka ïarong jongki ba don ha ka shuki” ong u ma Pala.
Mynta da kane ka pisa kin thied ïa ki MLA bad ïa ki vote jongki paidbah bad kin leh har rukom shwa ka election, ong u ma Pala.
Ha kaba iadei bad ka Congress u la ong ba ka lah ban long kum kato ka ïing kaba la shah rong noh ha ka eriong hynrei mynta ka la tei bad pynkhreh bha na ka bynta ka election MLA 2023. “ Kumta ai ba kine kiba don ha ka sorkar kin nang ïashrut para ma ki namar kat haduh ba kin da lah ban pynbeit ia ki kynrum kynram ka Congress ka la dep tei ïa ka ïing bad kan sa rat naphang pat ha ka election 2023 namar ka long kaba la pynkrheh bad da ka jingkyrshan jong u Blei ngi la lah ban ïoh ïaka por shisnem thik ban pynkhreh bha ïa ka election” Pynkut u ma Pala.