Pdiang burom ka KSU ïa ka Mynken CHSS
Watla rem haka phainal kum ki ‘Hero’ wan phai ïing ki rangïalehkai
Nongpoh, Nailur 13: Watla ka skul Mynken Christian Higher Secondary School kaba la leit ban mihkhmat ïaka jylla Meghalaya sha ka lympung Subroto Cup international Football Tournament kam shym la poi sha ka thong ban rah ïaka nam lahduh kumba la angnud, hadien ba kila shah pynliem haka jylla Manipur lyngba ka tie-breaker haka jingïakhun phainal, hynrei ki rangïalehkai U-17 jong ka skul Mynken kila wan phai pat sha ka jylla kum ki ‘Hero’.
Ka kynhun ïalehkai phutbol jong ka Mynken Christian higher Secondary School kila wan poi mynta ka janmiet sha ka jylla bad naka liang ka Sports and Cultural Cell jong ka seng Khasi Student Union kila leit ban pdiang burom ïaki mynta ka sngi ha Indoor Stadium Nongpoh hapoh ka jingïalam u Bah Lambok Rymbai Vice President KSU NKHD, U Samla Jony Nongrum Sports Sectary KSU NKHD, hakaba la sakhi lang ruh daka jingïadon lang u Bah Bobby L Nongbet DSO Ri Bhoi, u Coach bad Manager jong ka kynhun lem bad ki bahaing ha sem.
Shuh shuh ka long ruh ka jingsarong kaba khraw ha kaba uwei naki rangïalehkai ka Mynken u Samla Banpliebok Khongjoh u ba la ioh ruh ban khur ïaka nam Best Player na katei ka lympung Subroto Cup u la shah jied syndon ban leit pyntbit ïalade sha ka ri Germany bad Austria. Katba u Bah Kit Kharlukhi kum u Coach jong ka Mynken Christian Hr. Sec. School under 17 u la ioh ban rah ïa ka nam best coach.
Ki nongïalam ka KSU haba kren ha katei ka jingïalang kaba lyngkot, ki la pynpaw ïaka jingsngew sarong ba ka kynhun ïalehkai jong ka jylla bala mihkhmat da ka Mynken Christian HSS kaba la lah ban pynpoi shaduh ka phainal, ki la ong ruh ba watla kim shym la poi sha ka thong hynrei lyngba ka jinglehkai bha jong ki rang ïalehkai ka kyntiew shuh shuh ïaka nam jong ka jylla haka kam ïalehkai phutbol.
Naka liang ka kynhun jong ka Mynken Christian HSS naduh u Manager, Coach bad ki rangïalehkai kila ai ka jingkhublei ba kyrpang ïaka KSU kaba la kynmaw burom ïaki, namar kim shym poi pyrkhat ba ka KSU kan pdiang burom ïaki hadien ba kila shah rem noh haka phainal hynrei mar sien poi ha kane ka jaka ki dap pat daka mynsiem kaba kmen ban shah pdiang burom da ki nongïalam jong ka Khasi Student Union.