SHILLONG, Nailur 16: Ka Meghalaya State Kickboxing Association (MSKA) ka dap da ka jingsarong ban pynbna ba ka kynhun ïalehkai jong ka jylla ka la ïoh ban khur 16 tylli ki takma ha ka lympung ïakhun jong ka WAKO India Kickboxing Federation Seniors & Masters National Kickboxing Championship.
Kane ka Championship kaba san sngi lynter ka la sdang ha ka 08 tarik haduh ka 12 tarik Nailur, 2026 ha Indore, Madhya Pradesh, bad la ïalam ïa ka kynhun ïalehkai jong ka jylla da ka Daniella Mylliemngap kum ka Coach, Ineshabahun Dkhar-Assistant Team Coach bad Kisan Bareh-Team Manager.
U Franky Momin bad u Gideon Bansan Mawlieh ki la lamkhmat ïa ka kynhun da kaba khur mar kawei ka takma ksiar, bud sa 3 tylli ki takma rupa bad 11 tylli ki takma rnong ba la jop da kiwei pat ki nongïalehkai.
Ka long kaba kongsan ban kdew ba ka jingkheiñ khur takma (Medal Tally) jong ka MSKA naduh u snem 2017 haduh mynta ka la kynjoh 358 tylli ki takma, kynthup ïa 112 tylli ki takma ksiar, 98 tylli ki takma rupa bad 138 tylli ki takma rnong; ha ryngkat 67 tylli ki takma International Standards bad 9 tylli ki takma jong ka NEHU ha ka All India Inter University Games naduh u snem 2019.
