Shillong, Nailur 16: Ka Ri-Bhoi District Sports Association ka la pyndep ha ka kyrdan ba nyngkong ha kaba kut jong ka Meghalaya State Senior Athletics Championship 2026 hadien ba la pynhap pyrda noh ïa kane ka lympung kaba lai sngi lynter hynne ka sngi Balang ha Sports Authority of India centre, NEHU Shillong.
Ka Ri-Bhoi ka la pyndep ïa kane ka lympung, kaba la pynlong hadien 18 snem, da kaba khur 9 tylli ki takma ksiar, 7 tylli ki rupa bad 7 tylli ki rnong. Ka West Jaintia ka bud nadien ha ka kyrdan ba ar da 7 tylli ki takma ksiar, 6 tylli ki rupa bad 2 tylli ki rnong, katba ka East Khasi Hills ka wan ba lai da 5 tylli ki takma ksiar, 5 tylli ki rupa bad 2 tylli ki rnong.
Man kawei pa kawei na ki 12 tylli ki District ki la ïoh ban khur ym duna ïa ar tylli ki takma ha kane ka championship.
Nalor kane, ka khusnam Best Athlete la khur da u Eliam Bonkam G Sangma na South West Garo Hills (shynrang) bad ka Phibakmen Rynghang na Ri-Bhoi (kynthei). Katba ka khusnam ‘Most Promising Athlete’ la khur da u Lastly Suchiang na East Jaiñtia Hills (shynrang) bad ka Monlangki Kyndait na West Jaiñtia Hills (kynthei).
Ha ka sngi pynkut la wan kongsan da ka Glynis Leanne Nunn, ka nongïalehkai heptathlete ba jop takma ksiar ha ka Olympic kaba la mihkhmat ïa ka Australia ha ka Los Angeles Games ha u snem 1984. U synbud kongsan ha kane ka sngi u dei u Working President ka Meghalaya State Olympic Association bah John F Kharshiing.
Ka Nunn ka la don ha Meghalaya ban ïasam ïa ka jingtip jong ka lyngba ka MSOA bad ka Directorate of Sports and Youth Affairs na ka bynta ban kyntiew ïa ki sap ki phong jong ka thaiñ ban pynkhreh ïa ka National Games kaba 39 ha u snem ban wan.
Watla kadei na ka shong kaba rit jong ka Toowoomba, kaba wat haduh kine ki sngi ruh ka don tang 1.5 lak ngut ki nongshong shnong, ka Nunn ka la ong ba lada ka lah ban poi sha ka Olympic te uno uno napdeng ki 267 ngut ki nongïalehkai kiba la ïashim bynta ha kane ka lympung ruh ki lah ban poi sha katei ka lympung bah ba pawnam.
“Nga la kwah dikdik ban ïohi ïa ki katto katne ki jingïalehkai kiba kyrpang. Nga wan na ka shnong nongkyndong kaba rit, kumta ka lah ban urlong lada phi don ka jinglen lade, ka jingaiti bad ka jinglah ban shah ïa ka por ba phi donkam,” la ong ka Nunn. “Ka Sports bad ki jingïakop ka hikai ïa phi, ha baroh ki liang ha ka por ba phi jop bad ruh ha ka por ba phim jop namar ka pyni ïa phi ïa kaei kaba phi donkam ban pynbha. Kaei kaba kongsan kaba nga la ïoh jinghikai na ka jingïalehkai jong nga ka long ba phi hap ban sngewtynnad ïa ka.”
Katba u Bah John F Kharshiing u la ong, “Kham palat ban ïa ki takma, ka dei ka jingkoit jingkhiah. Kam dei ka jingpynlut kai ïa ka por hynrei ka jingbei tyngka ha ka kam jong phi,” u la ong. “Nga kyrmen ba ngi nang kiew na ka bor sha ka bor bad ba ki jingbha shimet ki nang kiew. Nga kyrmen ba phin leit biang sha la ki jong ki distrik jong phi bad pynshlur ïa kiwei ban shim ïa ka kam ïalehkai.”
Haba phaikhmat sha ka National Games, u bah John u la ong ba u “khmih lynti ba ka Meghalaya kan kiew shaphrang” ynda kan pynlong ïa kane ka lympung bah kaba heh ha u snem ban wan “bad ban lah ban ïakhun pyrshah bad kiwei pat. Ngi long kiba donbok shibun ban ïoh ïa u Myntri Rangbah bad u Myntri ka tnad ïalehkai kiba dang bteng ban bei tyngka ha ka kam ïalehkai.”
