Shillong,Jylliew 01 : U Symbud Myntri Rangbah ka jylla u bah Prestone Tynsong u la ong haba shim ïa kano kano ka rai da ka sorkar MDA la shim da ka jingmynjur lang jong ki kynhun ne party ba ïa synrop lang ha kane ka sorkar ym don kawei ruh ka rai kaba shim hi tang da kawei ka party ne tang da ka NPP.
U la ong ïa kane hadien ba la mih ki khubor ba ki don ki nongïalam jong ki party kiba iasynrop lang kiba kren halor ka jingweng bad jingbym weng na ka sorkar MDA namar kata ka President’s Rule ne jingsynshar President.
Haba kren sha ki lad pathai khubor u la ong “ Ngam don ei ei ban ong halor ki jingkynnoh jong ki party kiba ïasynrop lang ha ka MDA namar ïa kano kano ka rai ba ka sorkar ka shim la ïa mynjur lang da baroh ki kynhun kata lada ka dei tang hapoh ka sorkar ne hap ban wanrah ha ka Coordination Committee ruh”.
Tangba u la ong pat “ Kine ki jingkynnoh kim pynduh thiah duh dem satia namar ki ju mih ba la jan u 2023. Saw snem tam mynta ngi la ïatrei lang da ka jingïasngewthuh jingmut, ïakino kino ki rai la ïashimlang na ka bynta ka bha ka miat jongka jylla hynrei tang namar ba la jan ka election ki nongïalam ki sdang ban kynnoh da kumne kumtai, ïakine kiei kiei baroh ngin ieh bad shaniah beit ha ki paidbah ba kin bishar bad rai hi da ka vote jongki”.
Na ka liang u myntri sorkar bad MLA ka HSPDP u bah Renikton Lyngdoh Tongkhar u la ong ba ka party kam don kano kano ka jingthmu ban weng na ka MDA.
Kumjuh ruh u nongïalam ka PDF uba dei u myntri ka tnad sport u bah Banteidor Lyngdoh ruh ula ong lada don kino kino ki jingduna ne jingbakla kum ki party ba ïasynrop lang ki dei ban wanrah hakhmat ka Coordination Committee khnang ban ïakren sani bha ym ban ïathad da kumne kumtai.
