Shillong, Nailur 12: Ka Nongmensong SC bad ka Lumparing SC ki la lah ban khur pura ïa ki lai point hadien ba jop ïa ki jingïalehkai ha ka lympung Third Division 2024 jong ka Shillong Sports Association ba la long ha ka Sngi Palei ha madan SSA Stadium, Polo.
Na ka liang jong ka Nongmensong ka la pynliem ïa ka Kharang SC da 3-1 kol, katba ka Lumparing ka la jop da 3-2 kol ïa ka Iaityllilang SC. Kane ka la pynlong ruh ïa ka Kharang bad ka Iaityllilang ba kin mad ïa ka namrem kaba nyngkong mynta ka samoi.
Ha ka jingïakhun kaba nyngkong, dei ka Kharang SC kaba la ïoh ban lamkhmat ïa ka jingïalehkai lyngba ka kol na u Jaspal Kurbah (32 minit) hynrei tang katto katne minit la shah pynïakhaid noh ha u Midul Amsong ha ka minit ba 33 na bynta ka Nongmynsong.
Kane ka kol ka la ai mynsiem ïa ka Nongmensong ha kaba ka la ïoh ban pynbud sa ar kol ha ka kylla miet lyngba u Pynshai Jyrwa (58 min) bad na u Wilton Lyngdoh (90 min) ban pynthikna ïa ki lai point.
Ha ka jingïakhun kaba bud, lah ban kdew ba ka jingïalehkai ka long kaba marïabam naba baroh ar kynhun ki la pynkhihjar markylliang hynrei dei ka Lumparing kaba la ïoh ban thep tam kawei ban khur ïa ka jingjop.
Tang hadien 8 minit ba la ïaid ka por u Marbianglang Mawlong u la buh hakhmat ïa ka Iaityllilang hynrei u Riskhem Syiem u la pynïakhaid ïa ka jingïakhun shuwa ban kut ka kylla step (40 minit) na bynta ka Lumparing. Nangta u la thep sa ïa ka kol kaba ar ha ka 63 minit kaba la pynlong ïa ka Lumparing ban ïoh lamkhmat ïa ka jingïakhun.
U Sholinstar Syngli (66 minit) u la ïoh ban pynskhem ïa ka kynhun da kaba pynkhih ïa ka kol kaba lai shuwa ba u Enewell Kurbah (78 minit) un thep ïa ka kol kaba ar na bynta ka Iaityllilang.
Kane ka namjop ka la pynlong ïa ka Lumparing ban jam sha khliehduh na ka Group B ryngkat ki 9 point ba ka la khur na ki saw sien ïakhun. Hynrei, ka dang lah ban shah knieh ha ka Mawpat SC, kaba dang sah sa shi sien ïakhun, hynrei ka la pynthikna ïalade ban rung sha ka quarterfinal da kaba pynthikna ban don ha ka thup Top 2 na ka Group B.
Ha ka Group A ka jingïaknieh ka dang long kaba jur ha kaba lai tylli ki kynhun ki ïa ryngkat da mar 6 point, ba kynthup ïa ka Nongmensong, Nongumlong bad ka Pomlakrai ha ka kyrdan ba lai, ba saw bad ba san, marïabud. Katba ha ka kyrdan ba nyngkong la bat da ka Mawryngkneng, ka Kharang ha ka kyrdan ba ar. Baroh hynriew tylli ki kynhun (kynthuplang ïa ka Lapalang kyrdan ba 6) ki la dep ban ïakhun mar saw sien.
Ki jingïakhun ha ka kyrdan Third Division kin dang bteng biang ha ka Lah Sngi U Blei jong ka taïew ban wan. Katba ha kane ka Sngi Thohdieng yn bteng biang ïa ki jingïalehkai ha ka kyrdan SSA Second Division 2024. Ha ka por 12:30 baje mynsngi ka Imson SC kan aireng pyrshah ïa ka MLP FT, nangta ka jingïakhun kaba ar ha ka por 3:30 baje nohphaisngi hapdeng ka Smit SC bad ka Laitkyrhong SC. Ki jingïalhekai kin long ha SSA Ground, Polo.
