Sdang ka jylla ïa ka jingrakhe pynneh mariang shi bynta jong ka ‘World Environment Day’

Tura, Jylliew: Ka jingrakhe ïa ka taïew pynneh mariang ha ka jylla (Meghalaya Environment Week 2022) ka ba dei ruh ka bynta jong ka ‘World Environment Day’ la sdang hynne ka sngi hapoh Harding Theological College, Tura lyngba ka jingsam ïa ki symbai bad ki tynrai dieng ha ka ba la wan ïashim bynta da ki spah ngut ki khynnah skul.
Kane ka dei ka sienjam ka ba nyngkong napdeng ki ba bun ki prokram ba la pynlong hapdeng ka 1 tarik bad ka 7 tarik u Jylliew 2022, ïa ki ba la pynlong da ka jingtreilang ki tnat sorkar bapher bapher nalor ki agency ki ba kynthup ïa ka Centre of Excellence for Natural Resource Management and sustainable Livelihoods, Meghalaya Basin Management Agency, Soil and Water Conservation Department, Forest and Environment Department, Community and Rural Development Department, State Rural Employment Society, State Council of Science, Technology and Environment, bad ka tnat Agriculture.
ïa kane ka sngi ka ba nyngkong la rakhe kum ka ‘Environment Technology Day,’ bad ka ba pynpaw halor ki jingstad teknologi ba kongsan ki ba lah ban ïarap ha ka ba ïadei bad ka jingpynneh bad pynjyrngam ïa ka mei mariang ha ka jylla.
Ha kane ka prokram la ïa don ryngkat lang ruh u James Sangma Myntri ka tnat Forests and Environment Department kum u kongsan u ba ha ka jingkren u la pynpaw ba kane ka jingrakhe ka ba shitaïew kynthih ka long ban kyntiew halor ki lad pynshai paidbah halor ki mat ki ba ïadei bad ka mariang bad halor kiwei pat ki sienjam ki ba lah ban kyntiew halor kane ka bynta.
U la ong ruh ba ka lawei jong ka mei mariang ka shong ha ki kti jong ki samla bad ki khynnah pule, bad kumta na ka liang ka sorkar ka pynshlur halor ka jingïashim bynta ka jong ki ha ka ba ïadei bad ka jingsam ïa ki symbai bad tynrai dieng bad ban thung ïa ki ha la ki jong ki skul, ki kper, ki jaka khlaw bad kiwei pat.
Haduh kumba 400 ngut ki khynnahpule bad ki dkhot jong ki komiti na ki 100 tylli ki shnong ki la wan ïashim bynta lang ha kane ka jingrakhe.Nalor kine la ïa don lang ruh ki heh sorkar bad ki nongmihkhmat na ki tnat sorkar bapher bapher ka ba kynthup na ka tnat Soil and Water Conservation, Forests and Environment, Education, Agriculture, bad Horticulture.