Kumban iam ïathuh ki nongrep ïa ka nemsniew ba wan syllad mynta u snem

Shillong, Nailur 04 : Ka jingkiew dor ki mar rep ha ki iew ki hat kam dei ka dak kaba bha ïa ki nongrep namar kane ka kdew ba ka rep ka riang kam bha na kata ka daw sa kiew dor ki mar rep, ong ki nongrep ha ka jingïalang ba la khot da ka NPP – Farmer’s Front ha ka sngi Balang ha ka shnong Mawusam, Mawkynrew.
Ïa kane ka jingïalang ban kynduh bad sngap ïa ka jingeh jong ki nongrep la lum da ka Farmers Front jong ka National People’s Party hapoh ka jingïalam jong u Bah HM Shangpliang kum u Chairman bad Bah Kansing Lyngshiang kum u General Secretary.
Kiba bun ki nongrep ki ïathuh ba ha rilum ka nemsniew ka la syllad naphang lin khamtam kiba rep kubi, phan, sohsaw bad kiwei kiwei haduh ba kim ïoh shuh ban lum ïa ki mar rep ban leit die sha iew kumba ki ju leh ha ki snem ba la dep.
“Haba kiew dor ki mar-rep ha sor nang ïap thngan ki nongrep namar ka jingkiew dor kadei ba ka rep ka riang ka sniew,” ong uwei na ki nongrep. Shuh shuh u ong haba khyrwit ka nem sniew ïa ka rep ka dor ka poi 30- 35 shi kilo hynrei pat haba bha ka rep ka riang ka dor ki mar rep ka hiar teng teng haduh 5tyngka shi kilo ruh.
Katba uwei pat u nongrep na ka thaiñ riwar u la ong, “Ha ki snem ba la dep ka dor u synsar ka poi haduh 100 haduh 120 tyngka shi kilo hynrei mynta pat ka dor ka la hiar haduh 20 tyngka shi kilo. Shaei kein mynta ngin leit,” u la ong.
Don pat ki nongrep kiba ju rep ïa u strawberry ha ki thain riwar kiba iathuh ba ki shem jingeh ban pynroi ïa utei u mar rep namar ka jingjynjar ban pynbiang ïa ka um nalor ba ka dor ban thied ïa ki tynrai strawberry ka rem bha.
“Lada dei ba lah ban pynmih hi ïa ki tynrai strawberry na kane ka jylla lehse na ka 15tyngka shi tynrai la lah ban ïoh 5 tyngka. Ngi kyrpad ruh ïa ka sorkar ba kan pynbiang wat ïa ki jaka pynpoi um namar kine ki mar rep khlem ka um kaba biang kin ym lah ban im,” u la ong.
Kumta, kiba bun ki nongrep ki kyntu ruh ïa ka sorkar jylla ba kan pyntikna ba ki symbai ba ka ju sam ka dei ban pyllait ha ka por ba dei ban thung ym ba kan sam ynda la kut ka por thung namar kine ki la shu lehnohei.
Don pat ki nongrep kiba pyntip ba ha ki thain riwar ka jur bha ka jingbam khniang ïa ki dieng soh kiba la ïap tram lut bad kumjuh ruh ka jingdon ki kynja khniang kiba bam ïa u tympew.
Haba ïadei bad ki mar rep, ki la don ruh ki paidbah kiba ïathuh ba haduh mynta ka jingshah ot kilo ka dang bteng ha iew bad kane hi ka la ktah bha ïa ki.
Haba kren pat halor ka kam ri jingri, ki la ïathuh ba kim da tip than shaphang ki skim ba ka sorkar ka ai na ka bynta ban pynïar ïa ka ri jingri.
Kumta na ka liang u Bah HM Shangpliang kumjuh u Bah Kansing Lyngshiang haba kren ha ka jingïalang ki la pynshai sha ki paidbah ba ka jingwan jong ki sha ki paidbah ka long ban ïohsngew markhmat ïa ki jingeh jong ki nongrep bad dei da katei ka thup jingtip ba ki ïoh lum ki sa rah pat ha ka miej jong u Myntri Rangbah Conrad K Sangma bad ha u Symbud Myntri Rangbah Bah Prestone Tynsong ban pyni markhmat khnang ba kin tuklar lang.
Lah ruh ban kdew hangne ba katei ka jingïalang kadei kaba nyngkong eh ba ka NPP Farmers Front ka sdang bad nangne shakhmat kan leit haman la ki Block ban kynduh ïa ki paidbah ka thaiñ ban ïohsngew markhmat na ki ïa ki jingeh ba ki kynduh.