Shillong, Nailur 02: Ka khubor ba la ïoh na ki pulit la ïathuh ba u Guru Charan Singh u la phah ka jingujor ba ha ka 28 tarik u Nailar ha ka por kumba 3 baje nohphai sngi, ki runar bym lah ban ithuh ki la prong hapoh ka ïing jong u kaba ha Lawsohtun Block-1, Shillong bad ki la tuh ïa kawei ka TV set.
Ha kawei pat ka jingjia uwei u nongshong shnong ka Shillong u la phah ka jingujor ba ha ka 12 bad 18 tarik u bnai Nailar, ka la don ka jingshah sei pisa tuh kaba la kot kumba T. 50.98 lak, napoh ka bank account jong u.
Sa kawei pat ka jingjia kawei ka longkmie kaba sah ha Shillong ka la phah ka jingujor ba ha ka 30 tarik u Nailar ki runar bym lah ban ithuh bad kiba deng mask ki la byrngem ïa ka khun jong ka.
Shuh shuh na ka liang jong ki pulit ki la ïathuh ba kawei ka longkmie kaba sah ha Eastern West Khasi Hills ka la phah ka jingujor ba ha ka 29 tarik u Nailar ha ka por kumba 3 baje nohphai sngi, ka la ïohpdiang ïa ka jingphone, ha kaba une uba phone u la pyntip ba u dei u na customer care bad u la pan ïa ka credit card number jong ka, ha kaba kane ka longkmie ka la ai. Kham hadien pat ka la shem ba ka pisa kumba T. 3,05,097/- ka la shah sei tuh napoh ka credit card jong ka.
Na ka liang jong ki pulit ki la ïathuh ruh ba kawei ka longkmie na East Jaiñtia Hills ka la phah ka jingujor ba ha ka 28 tarik u Nailar ha ka por kumba 6.30 janmied, uwei uba la pynithuh kyrteng da Lalsiemthang Lungtua @ Thanga, u la ktah kti ïa u kurim jong ka u Lalhmatuoi Lungtua, da ka tari. Ha kaba ïadei bad kane ka jingjia utei u rangbah u la mynsaw bad la pynkitnoh sha Woodland Hospital, Jowai.
