Nongpoh, Nailar 27: Hadien ka jingpynmih khubor jong ki nongshnong ka shnong Umroi Madan kiba la leit ban jurip ruh ïaka jaka ba thmu pynïaid ïaka surok 4-Lane na Umiam sha Malidor lyngba ka shnong Umroi Madan, ki nongïalam shnong jong ka shnong Umroi Madan mynta ka sngi kila mih shakhmat ban pynshai ïa ka jingkynnoh ki katto katne ngut ki rangbah kiba la leit ruh ban ujor sha u DC halor ka jingkynnoh ba katei ka surok 4-lane ka ngat ruh ïaka tyllong um jong ka shnong Umroi Madan.
Haba kren sha ki lad pathai khubor naka liang u Bah Lamborlang Makri Rangbah Shnong bad u Bah Banshanskhem Rynjah Secretary shnong ka Umroi Madan kila ong ba katei ka jingleit jurip jong ki nongshong shnong ba pyrshah ïaka surok 4-lane kum ka shnong kam don jingtip eiei bad kam shym la don ryngkat, namar kum ka shnong ka ïai ap khmih lynti ïaka jingwan ki briew naka ophis u DC ban wan jurip kumba ki nongshong shnong kila ujor ha u DC u ba la kular ruh ban pynlong ka jingjurip ïa katei ka jaka.
Ban ioh ïaka jubab kaba shai halor ka jingngat ne em ka tyllong umdih jong ka shnong naka jingwan jong ka surok 4 lane kum ka shnong ka dang ap khmih lynti ïaka jingjurip namar kim dei ki riew stad ban batai stad ïaka jingduh ne em ka tyllong um kumba kala don ruh ka jingpynshai ba yn pynlait ïaka tyllong um kumba 50-meter eiei ka jingjngai.
Halor ka jingkynnoh u Bah T Marbaniang ba kumno ka surok 4-lane ka kiew sha ka jaka ba don ka tyllong umdih jong ka shnong Umroi Madan, bad kum ka shnong kam tip balei ka sorkar ka pyniaid na katei ka lain bad ha kaba ïadei bad katei ka bynta ki dei ban kylli na ophis u DC ban ioh ka jingtip ba bñiah, namar kaba bha tam ngi ap khmih lynti hi ïa kata kaba u DC u la kular ban wan jurip la kata ka um ka duh shisha ne em lada wan kata ka surok 4-lane, hynrei ngi kyrmen skhem ba katei ka kompani kaba pyntrei ïa katei ka surok kan leh ïa kaba bha tam.
Kila ïathuh ruh ba ha kaba nyngkong mynshuwa la wan ban sorjamin naka surok kaba rim, hynrei la ioh jingtip pat hadien bala pynkylla ïaka jingïaid lynti bad kam pat wan ka jingthoh kaba thikna bad kum ka shnong tang mar ia ioh jingtip kala leit mar mar ban pyntip sha u DC ba kam kwah ban ngat katei ka tyllong um bad ioh ruh ka jubab na u DC ba u la dep ban phah jingthoh sha ka NHIDCL kaba dei ka kompani ba pyntrei ïa katei ka surok bad kum ka shnong kam shym la thep ïaki kot ki sla ha pla kumba la kynnoh da kitei kitei ki rangbah.
“Katei ka surok kan jngai kumba 50-meter eiei ka jingjngai bad ngim dei ki riew stad ban batai stad la katei ka tyllong um kan duh ne em bad nga ngeit skhem ba u Bah CL Masharing bad Bah T Marbaniang ruh kim dei ki riew stad ban tip ba ka um kan duh ne em” la ong kitei ki rangbah da kaba bynrap ruh ba naka liang u DC u la kular ban shimkhia ban jurip ïa katei ka jaka hynrei balei kitei ki rangbah kim lah ban ap hynrei la shu thad ïaki nongïalam shnong haki lad pathai khubor bad lehse ka don eiei sha lyndet namar u CL Masharing u la dei lypa u dkhot ka Executive Committee bad u la don lypa ka buit ban thad ïaki nongïalam shnong.
Kum ki nongïalam ka shnong Umroi Madan kila kren ruh da kaba shai sha kitei ki riew rangbah kiba pyrshah ba kidei ban leh kum ki rangbah namar naka liang ka shnong ka kwah ban long kawei ban ïa bha lang ym ban kawang ktieh haki lad pathai khubor bad kum ka shnong shen kan sa lum da ka jingïalang bad kyrmen skhem ba u Bah CL Masharing bad ki dkhot ka EC kin wan sha katei ka jingïalang ban ïashai.
