Shillong, Nailar, 24: Wat hadien ba ka la don ka jingkylla ha ka sain pyrthei ha ka jylla ha kine ki sngi hynrei kan pat kaba phyla ba u MDC ka Mawkhar-Pynthorumkhrah constituency u Bah P N Syiem u la ong ba ia u haduh mynta ym pat ju don kiba khot ban wan pyniasoh bad kano kano ka party.
Ïa kane u la jubab ïa ka jingkylli ïoh lehse na ka liang ka NPP ka la khot lang ruh ïa u ban wan pynïasoh noh sha kane ka party kumba ka la leh ïa kiwei pat ki laingut ki MLA ka Congress kiba kynthup ïa u MLA ka Congress na Mawhati u Bah Charles Marngar, nangta u MLA ka Nongpoh u Dr Celestine Lyngdoh bad u MLA ka Nongstoiñ u Bah Gabriel Wahlang kiba mynta ki la long ki dkhot ba pura ka NPP.
Hadien ba bun na ki nongmihkhmat ki la leit ban pynïasoh ïalade sha ka seng NPP ne ba ki la shah khot ha ka seng NPP, shuh shuh na ka liang MDC ka Congress na Mawkhar Pynthorumkhrah MDC Constituency u Bah P N Syiem u la ong ba ha kane ka por kaba mynta ym donkam ban leh shongshit namar hap sngap ïa ka rukom pyrkhat ki paidbah bad mynta hap donkam ban sian ym kum mynshwa ban leh kumno kumno ruh biang, mynta ki paidbah ki la stad bad sian ha ka saiñ pyrthei.
U la ong ba ha ki por mynshuwa la ïohi ba bun ki riew saiñ pyrthei ki leit bad ki rung ne ki mih katba mon namar u paidbah ruh u dang long da kumwei, hynrei mynta kam long shuh kumta namar ba ki paidbah mynta ki la stad bad ym long shuh ban leh kai.
