Mairang, Nailar 24 : Ka National Tuberculosis Elimination Programme (NTEP) hapoh ka scheme Pradhan Mantri TB Mukt Bharat Abhiyan (PMTBMBA) ba la pynïaid da ka ophis jong ka Tuberculosis Unit Mairang Eastern West Khasi Hills District, ha ka 23 Tarik Nailar ka la pynong ïa ka jingsam jingbam ei ïa kito ki briew kiba don ïa ka jingpang Tuberculosis halor ka jingthmu ban ïarap ïa kito kiba don ka jingpang Tuberculosis.
Ïa kane ka prokram la pynlong ha MCH Hospital, Mairang Eastern West Khasi Hills District ha ryngkat ka jing ïa don lang ka District Nodal Officer PMTBMBA ka kong Bornali B. Nongrum, ka Dr. Soma Bhowmick vice chancellor William Carey University Shillong, u bah Evan Marwein (STLS), u bah Pyiur Marbaniang (STS) bad ka kong Magrita Lyngdoh (DPC Piramal).
Haba kren ha ka jingïalang, Ka kong Bornali B. Nongrum District Nodal Officer PMTBMBA ka la pynpaw ka jingsngew nguh bad ai khublei ïa ka Dr. Soma Bhowmick vice chancellor William Carey University Shillong kaba la theh jingïarap da ki jingbam tei met ïa kiba don ïaka jingpang TB bad ka la maitphang shibun kiei kiei kiba dei ki lad ki lynti ïa ki nongpang ba ki dei ban leh, bad ha kajuh ka por kala pynshai bad ïathuh ruh ïa ki jait skim bapher bapher bad ka jingïarap da ka pisa ha ka por ba ki dang don hapdeng ka jingsumar bad kane ka long tang na ka bynta kito kiba pang Tuberculosis.
Ka Dr. Soma Bhowmick vice chancellor William Carey University Shillong ka la ong ba kan ïa rap katba lah hi kan ïai bteng bad shim khia ban pynbit pynbiang ïa ki jingdonkam jong kiba pang Tuberculosis, bad ka la kyntu ruh ba ki dei ban long tista bad minot ban dih ïa ki dawai ban shim ïa ki lad jingsumar kumba la bthah da ki nongsumar kiba na ka tnat ka koit ka khiah ban dup koit kloi na ka jingpang,
Kiwei pat kiba la ai jingkren ha katei ka prokram ki kynthup ïa u bah Evan Marwein (STLS), u bah Pyiur Marbaniang (STS) bad ka kong Magrita Lyngdoh (DPC Piramal) bad la ïoh ruh ban kren na ki nongpang ki ba ïathuh hala ki jong ki jingshem jong ki. Ki jait jingbam kiba la sam sha kiba pang Tuberculosis, ki kynthup ïa ka pylleng, u dai, nutrella bad kiwei kiwei ki jait jingbam, bad ki don 8 ngut kiba pang Tuberculosis kiba la poi sha katei ka prokram ha katei ka sngi.
