Shillong, Nailar 24 : U Myntri Rangbah ka Jylla, Conrad K Sangma ha ka sngi Saitjaiñ u la ïoh mih noh na Civil Hospital Shillong hadien ba u la sah shah sumar shimet hangtei na ka daw ka jingpang shit met.
Katkum ka kyrwoh ba la phah da u Commissioner & Secretary ka tnad IPR, u Vijay Kumar Mantri la ïathuh ba ki bor pynïaid ka Civil Hospital ki la pyllait noh ïa u Myntri Rangbah hadien ba u la ïoh ïa ka jingsumar ïa ka jingshitom jong u.
“Tangba u Myntri Rangbah un dang don ha ka jingshah sumar bad un hap ban bteng ïa kane ka jingsumar ha la iing sah jong u,” ong ka kyrwoh.
La ïathuh ba u Myntri Rangbah u la ïoh ïa kane ka jingshitom na ka Scrub-typhus bad Typhoid.
Shuh shuh la pyntip ba ki doktor ki la ïai peit bniah ïa ka koit ka khiah jong u na ka por sha ka por.
La pyntip ruh ba mynta u Myntri Rangbah u la kham khlaiñ bad kham ïohbor.
Kumban shu kdew hangne, ïa u Myntri Rangbah la pynkit mardor sha katei ka jaka sumar hadien ba u la ud pang kynsan na ka jingshit met ha ka sngi Thohdieng.
