Ka ïing ka kynjah haba 3 ngut ki dkhot ki la mih noh, ong u MDC ka Mawkhar-Pynthorumkhrah

Shillong, Nailar 23: U MDC ka Mawkhar-Pynthorumkhrah bad u nongïalam ka Congress u Bah P N Syiem u la ong ba kum u dkhot jong ka ïing u sngew kynjah haba 3 ngut ki dkhot jong ka ki la mihnoh hynrei ym lah ban leh eiei kaei kaba donkam mynta ka long ban hap trei shitom ban pynkhlaiñ ïa ka party ha baroh ki liang.
Haba ong ba watla ka party ka la mad ia kane ka jingeh kaba long kum ka jingwan ka umsaw, hynrei u la ong ba ha kane ka por ba wan ka jingeh ïa ka party donkam ïa u President ban phai dien biang ban khmihbniah bad kam donkam kata ka jingmut jingpyrkhat ban pynhab shuki President jong ka MPCC.
“Ha ka saiñ pyrthei ym lah lait na kum kine ki jingjia ne ki jingïakynnoh iwei ïa iwei pat, hynrei kaei kaba donkam mynta ka long ka jingtrei shitom ban pynkhlaiñ biang ïa ka party,” ong u u Bah PN Syiem haba kylli halor ka jingbym hun jong ki katto katne ki dkhot ïa ki rukom treikam u President ka MPCC u Bah Vincent Pala ha kaba ka la don ruh ka jingkren ba ki kwah ïa u ban hair shuki noh.
Lah ban pynkynmaw ba ki 3 ngut ki MLA Congress ki la mih noh na ka seng ha kaba ki la leit ruh ban pynïasoh noh ïalade sha ka seng National People’s Party (NPP) ha kaba kane ka la kyntiew ïa ka jingdon ki MLA ka NPP sha ka 31 ngut hapoh ka Ïingdorbar Thaw Aiñ ka Jylla kaba don ia 59 ngut ki dkhot ka ïing.