Nongstoiñ, Nailar 21: Ki nonghikai jong ki skul SSA jong kiba don ha ki ar tylli ki district kata ka West Khasi Hills bad Eastern West Khasi Hills District hapoh ka shatri jong ka All Meghalaya SSA School Association, kin pynlong ïa ka jingïalang ha Mount Hermon Secondary School New Nongstoiñ ha ka 24 tarik kaba dei ka sngi saitjaiñ ha ka por 10.30 baje mynstep.
U Babu B.P.Shangpliang General secretary ka Association la ong ba ka jingkhot jong ka Association ïa katei ka jingïalang, ka long ban ïatai halor ki jingeh ba ki nonghikai ki ïakynduh na ka daw jong ka jingbym shimkhia jong ka sorkar ïa ki jingdawa ba ka Association ba ka dei ban pynkiew noh ïa ka tuklop jong ki.
Ki nonghikai SSA ki dap da ka jingsngewkhia halor ka jingleh bym kheiñ snep jong kane ka sorkar naduh ka MDA I haduh ka MDA II, hynrei ki sorkar ba mynshuwa wat la kim lah ban regularize ïa ki post jong ki nonghikai skul SSA ruh, hynrei ka don ka kabu bad ki ju ai ka kabu na ka bynta ki nonghikai ha ki lai haduh saw snem.
U la kyntu ruh ïa baroh ki nonghikai jong ki skul SSA ban klet noh ïa ki jingsngew pher kynhun ne Association, hynrei kin wan ban ïashim bynta lang da kaba sngewkhia haba ki trei ïa kajuh ka kam, namar ha katei ka sngi ka Association, kan ïa pyrkhat sani bha kiba kum kino ki lad jingïakhih kin shim ban pynsngew sha ka sorkar, ba kan pynurlong noh ïa ki jingdawa jong ki, kiba la sahteng la slem.
Ka sorkar kam dei ban kheiñ dew thala ïa ki nonghikai namar ki nonghikai ki dei ki nongsaiñdur na ka bynta ka lawei jong ki khun ki kti jong ka jylla. Lada ki nonghikai kim trei shitom yn ym don babu, sahep, ophisar ne ki riew nang riew stad bad kano kano ka jylla ne ka ri ha ka pyrthei kan ym lah ban kiew shaphrang lada ki paitbah ki dei ki bym nang bym stad, pynkut ka kyrwoh.
