Shillong, Nailar 18 : Ki arngut ki MLA jong ka Congress kiba la don mynta ha ka jingshah sospon na bynta 6 snem ki don ha ka jingartatien ban ioh pynïasoh sha ka party NPP kaba ïalam mynta ïa ka bor synshar ha ka sorkar jylla namar ka jingtieng ïoh ki shah mait kyrteng.
Lah ban kdew hangne ba ka MPCC ha ka 16tarik mynta u bnai ka la pynmih da ka rai ban sospon 6 snem ïa u MLA ka Mawhati Bah Charles Marngar bad kumjuh ïa u MLA ka Nongstoiñ Bah Gabriel Wahlang hadien ba la phriang ki khubor ba ki don ka jingthmu ban leit pynïasoh noh sha ka NPP.
Shwa kane, ki tyllong khubor na ka Congress ki lapyntip ruh ba baroh sawngut ki MLA ka Congress ki la shah khot sha Delhi na ka bynta ban kynduh ia ki nongïalam ka Congress hynrei la ong ba na ka liang u Bah Gabriel bad u Bah Charles kim shym la poi satia.
La ïathuh ruh ba dei na kane ka daw ba ka party kam don lad shuh da kumwei hynrei ban shim da katei ka lynti ban sospon noh ïa ki hadien ba ki la ïoh jingtip na ka Block Congress Committee ba ki long pyrshah ïa ka party.
“Ngi la dep ai ka jingmaham ïa ki. Hadien ba kine ki arngut ki la shah sospon na bynta 6 snem watla ki kwah ban pynïasoh sha kawei pat ka party kin ym lah namar ki don ha ka jingshah sospon,” ong u heh Congress. Nalorkata, u la ong ruh ba 50 persen la shah sospon bad mynta khlem da don ïa ka ar na ka lai pawa, kin ym lah satia ban kyntiap seng lym kumta kin ngat ha ka jingshah mait kyrteng.
Ha kajuh ka por la pyntip ruh ba mynta ka party ka la weng noh ruh ïa u Bah Gabriel Wahlang na ka kam kum u President jong ka District Congress Committee ha ka sngi Saitjaiñ ba la dep.
Halor ka jingkylli, utei u heh Congress u la ong ba lada jia ba u Dr. Celestine Lyngdoh u kwah ban donlang bad ki ban pynïasoh sha kawei ka party kin ym lah satia hynrei kin ngat ha ka jingshah mait kyrteng katkum ka Representative of People’s Act namar arngut na ki, ki don ha ka jingshah sospon.
La ïathuh ruh ba mynta kitei ki MLA ki hap ban ai jingpynshai sha ka party lym kumta kin bteng ban don ha ka rai shah sospon.
