Yn khang ki OPD ka Super Care bad Bethany Hospital ha Ri-Bhoi bad Shillong, pynrem ïa ka jingjia ha Kolkata

Nongpoh, Nailar, 16: Ki bor pynïaid jong ka Bethany Hospital, Nongpoh ha ka janmiet sngi Thohdieng ki la pynlong ka jingthang mombati kum ka dak ka jingsngewlem halor ka jingshah leh be-ijot bad shah pynïap dusmon jong kawei ka Doctor kaba dang shah hikai pyntbit ha RG Kar Medical College and Hospital ha Kolkata, West Bengal.
Ha ka jingthang mombati la ïashim bynta da ki nongtrei jong ka Bethany Hospital naduh ki doctor, ki nurse bad ki nongtrei kum ka dak ban ïadon bynta lang ha ka jingïakhih jong ki nongtrei ka Koit ka Khiah ha ka ri baroh kawei ban dawa ïa ka hok jong ka doktor ba la shah pynïap bad ban pynthikna ïa ka jingshngaiñ na ka bynta ki kynthei bad ki nongtrei ka koit ka khiah ba kum kine ki jingjia kim dei ban dang jia shuh nangne shakhmat.
Ki bor pynïaid jong ka Bethany Hospital ki la pynbna ba baroh ki Out Patient Department ka Bethany Hospital ha Ri-Bhoi kaba don ha Umsning, Nongpoh bad Byrnihat bad kumjuh ruh ha nongbah Shillong kin khang khyrdep ha ka sngi Saitjaiñ mynta ka taiew kum ka jingkyrshan lang hadien ka jingpynbna jong ka Indian Medical Association (IMA) ïa ka jingïakhih kaba 24 kynta ban dawa ïa ka hok jong ka samla pule Doktor bad ka jingshngaiñ jong ki nongtrei ka tnad ka Koit ka Khiah.
La pyntip ba yn plie tang ka jaka sumar ba kyrkieh (Emergency Services).
U Deputy Medical Superintendent jong ka Bethany Hospital u Dr. CM Pohshna u la ong ba kum ka kynhun ki doctor bad ki nongtrei ka tnad ka Koit ka Khiah ki pynrem jur ïa ka jingjia kaba la pynpar ñiangkhriat ïa ki kynthei khynnah namar ka kam bymman jong ki runar haduh ba kin da pynïap syndon hadien ba ki la dep ban leh kput.
U la ong ruh ba Sorkar ka dei ban shimkhia ban wanrah ka jingshngaiñ ïa ki kynthei la ka long ha ki hospital, ha ki ophis sorkar, ha ki skul bad kumta ter ter namar ka jingsyier ha ka leit ka wan khnang ba kin lah ban ai ka jingshakri kaba paka ha ka kam kaba ki trei.