Ki la byrngem byrsit ban pynïap bad ban dih snam ruh, kynnoh u Bah Phaibor Paliar

Mawkyrwat, ‘Nailar 16: U Acting Lyngdoh jong ka Kur Paliar, Nobosohphoh Syiemship u Bah Phaibor Paliar ha ka sngi Thohdieng ryngkat bad ka ïing ka sem ki la mih shakhmat ban pynshai paidbah lyngba ki lad pathai khubor ïa ka jingshah thombor ha ki paitbhur ha ka jammiet 14 tarik mynta u bnai.
Katkum ka jingjia ba la ïathuh da u Bah Phaibor Paliar ba haduh ban sa poi u pud ban siat pyntieng da ka suloi, la ong ba hadien ba ki paidbhur ki la tur ban thombor ïa ka ïing ka sem jong ki da kaba byrngem byrsit ban pynïap bad ban dih snam bad ki la lun maw ïa ka ïing ryngkat ka jingpyrshang ruh ban pynpra ïa ka jingkhang heh ba kin rung shapoh ban leh kino kino ki kam ba mynsaw kumba ki la byrngem.
“Ha ka jingkut lad, i pa jong nga na ka jingthiah pang i la khie ban pynbthei da ka suloi ban ïada ïa ka ïing ka sem na ka jingjia kaba la shyrkhei kaba la ap ïa ka ïing ka sem ka jong ki,” ong u Bah Phaibor bad bynrap, tang mar ïa bthei ka suloi kine ki paidbhur kiba la pyrshang ban thombor ki la randien noh bad kumjuh ruh da ka jingshimkhia jong ki bor Pulit ha kaba ki la poi kloi ha kane ka jaka la lah ban ai jingïada ïa kane ka longïing kumta ki la lait na ka jingshah thombor.
Haduh mynta, san ngut ki briew ki la mynsaw na ka jingsiat suloi, kata, u Banteilang Paliar 16 snem na ka shnong Mawpat, u Jim Paliar 36 snem na shnong Mawpat, u Justarwell Paliar 23 snem na shnong Nongdiloiñ bad u Pyndapjingkyrmen Paliar 21 snem na shnong Demnar ki la mynsaw bad mynta ki dang don hapdeng ka jingshah sumar ha NEIGRIHMS Hospital.
U Bah Paliar u la ïathuh ba ka daw baroh kaba la poi ha une u pud ka dei namarba u nonglum bai musur ha ïew um shym la wan da lade ban khrong ïa ka musur hynrei u la phah pateng da kiwei ki briew ki bym shym la ithuh.
Kumta ki paidbah nongshong ïew namar kim ithuh ïa kita kiba wan ban lum bai musur ki la kyntait ban siew ïa ka bai musur bad dei hangta ba ka la mih ka jingklumar.
U Bah Paliar kum u Acting Lyngdoh ba la thung da ka Kur ban peit ïa ki kam jong ka Kur u la pyntip noh marmar ïa kane ka jingjia sha ki bor jong ka aiñ ïa kane ka jingklumar.
U la ïathuh ruh, katba u dang wan phai na Police Station, kumba shi kynhun ki briew ki la khang kdong ïa u ha shiteng lynti da kaba ki la pyrshang ban pynsangeh jubor ïa ka kali ka jong u hynrei u la lait phet noh na kane ka jaka bad kine ki briew ki la kthong ïa ki haduh ban da poi ha ïing.
U Bah Paliar u la kyntu ruh ïa u President jong ka HANM jong ka South West Khasi Hills District ba um dei ban shu kynthoh khlem da tip ïa ka jingjia hapoh ka ïing ka sem jong u.
U Bah Paliar u la ong ba um lah satia ban pdiang da leilei ïa ka jingkynthoh jong u President ka HANM namarba u la kynnoh ba la shu siat ïa ki briew kumba siat ïa ki mrad hynrei ka jingsiat suloi ka dei tang ka jingsiat ban pyntieng ïa ki paidbhur na ka bynta ban ïada na ka jingshah thombor ïa ka ïing ka sem.
Ha kajuh ka por u Bah Paliar u la ong ba u President jong ka HANM u dei ban kren pynshai ïa ka ïing ka sem ka jong ki lym kumta ka ïing ka sem jong u Bah Phaibor kan ym lah ban pdiang ïa ka jingkren laplah jong u President ka HANM.
Halor kane ka jingjia, ki Pulit ka Mawkyrwat Police Station ki la pynlong ïa ka jingtohkit kaba bniah.