Shillong, Nailar 16: Ka long ka nam bad ka burom ïa ka jaidbynriew hadien ba u Samla Lionel Daryl Rymmei u la mih kyrteng ha ka thup kynhun ïalehkai jong ka ri India ka ban ïakhun ha ka SAFF U-20 Championship 2024 ha Nepal.
Lah ban kdew ba u Lionel u la long u wei napdeng ki san ngut ki rangapkol jong ka ri kiba la shah jied ban don bynta ha ka prokram kilanmet ha Goa ban pynkhreh ïa kane ka lympung, bad katkum ka thup kyrteng ki 23 ngut ki player ba la jied da u Ranjan Chaudhuri (Coach ka India) , lai ngut ki rangapkol la ïoh ban jied bad u Daryl Rymmei u la long u wei na ki.
Ha kane ka lympung, ka kynhun India ka la shah thup ha ka Group B kaba kynthup ïa ka Bhutan bad Maldives. Katba ha ka Group-A, ki kynhun ki long ka Bangladesh, Nepal, Pakistan bad ka Sri Lanka.
Ka jingïakhun kaba nyngkong jong ka India kan long pyrshah ïa ka Bhutan ha ka 19 tarik Nailar, nangta bud sa ka jingïakhun pyrshah ïa ka Maldives ha ka 23 tarik mynta u Nailar. Baroh ar ki jingïalehkai kan long ha ka por 3:45 baje nohphaisngi.
Khyndiat haba phai sha u Lionel Daryl Rymmei, u dei u rangïalehkai jong ka FC Goa. Dang shen u la ïoh mih madan ïa ka kynhun U-19 jong ka ri bad ruh ïa ka kynhun Meghalaya ha ka National Football Championship na bynta ka Santosh Trophy dang shen mynta u snem bad ruh ha u snem ba ladep ha ka 37th National Games.
Hadien ba ka jingïakhun ha ka SAFF ka la kut, ka kynhun kan bteng kilanmet ha Goa ban pynkhreh ïa ka AFC U-20 Asian Cup Qualifiers 2025, ïa kaba kin ïakhun ha u Nailur, 2024 ha Laos. Ha kane ka lympung ka India ka la shah pynïakaplang ryngkat bad ka Iran, Mongolia bad ka Laos ha ka Group G.
Ki kyrteng jong ki player ka kynhun India ki long:
Goalkeepers: Lionel Daryl Rymmei, Sahil, Priyansh Dubey.
Defenders: Ricky Meetei Haobam, Surajkumar Singh Ngangbam, Malemngamba Singh Thokchom, Dhanajit Ashangbam, Manabir Basumatary, Thomas Kanamoottil Cherian, Sonam Tsewang Lhokham, Pramveer.
Midfielders: Manjot Singh Dhami, Vanlalpeka Guite, Akash Tirkey, Ebindas Yesudasan, Manglenthang Kipgen, Gurnaj Singh Grewal.
Forwards: Kelvin Singh Taorem, Korou Singh Thingujam, Monirul Molla, Thanglalsoun Gangte, Naoba Meitei Pangambam, Gwgwmsar Goyary
