SHILLONG, Nailar 16: Kum ka lad ban kyntiew ïa ki kynthei ha ka jingïalehkai Judo ka Meghalaya Judo Association ha ka jingïatreilang bad ka Judo Federation of India kan pynlong ïa ka ASMITA Judo League East Zone ha nongbah Shillong. ïa ki jingïalehkai yn pynlong hapoh SAI Indoor Stadium ha Nehu bad ka jingsdang ban thew kilo ïa ki nongïashimbynta la sdang naduh ka 16 tarik mynta u Nailar, katba ki jingïakhun kin sdang naduh ka 17 tarik.
Ha ka East Zone ki don haduh 12 tylli ki jylla ba kynthup ïa ka Bihar, Jharkhand, Odisha, West Bengal ryngkat bad phra tylli ki jylla ka thaiñ Shatei Lam mihngi, naduh ka Assam, Meghalaya, Mizoram, Arunachal Pradesh, Nagaland, Sikkim, Tripura bad Manipur. Napdeng kine ki 12 tylli ki jylla, 10 tylli ki ban ïashimbynta ha kane ka lympung.
Haba ïakren sha ki lad pathai khubor, na ka liang jong u Bah MF Mawlieh-dkhot jong ka Meghalaya Judo Association, u la pyntip ba kin don 45 ngut ki kynthei ïalehkai Judo ka Jylla ki ban ïashimbynta naduh ka Sub-Junior, Junior, Cadet bad kyrdan Senior.
Shuh shuh u la bynrap ba ki nongjop kiba khur takma ksiar bad rupa kin shah jied ban ïashimbynta ha rynsan ïakhun ba khadduh hapdeng ki lahduh bad kiba poi kyrdan ba ar na ki Zone.
Lah ban kdew ba kane ka lympung ïalehkai Judo League la phiah ha saw tylli ki Zone, ba kynthup ïa ka East Zone, North Zone, West Zone bad South Zone. Bad da ka jingwan jong kane ka ASMITA Judo League East Zone ha nongbah kan long ka kabu ksiar ïa ki khynnah bad samla kynthei ka jylla ba kin pyrshang bad pynpaw ïa ka sap kaba ki don ha kane ka jingïalehkai.
Ka song tyngka ba la pynkhreh ka long 4.26 Lak ba la kyllumlang ïa baroh ki khusnam jong ki kyrdan bapher bapher, bad ka jinglut jingsep ka ba kot ïa ka 11.70 Lak, kaba pyni ïa ka jingkular ban pynroi ïa ka jingïalehkai Judo ha ka thaiñ.
Da ka jingwan jong ka ASMITA Judo League East Zone ka Meghalaya Judo Association ka kyrmen skhem ba kan kyntiew ban nang pynroi ïa kane ka jingïalehkai na bynta ki samla ka jylla khamtam ïa ki kynthei.
