Shillong, Nailar 16: Kum shi bynta ka jingïasnohkti lang bad ka Ri India baroh kawei ban rakhe ïa ka sngi jingïoh laitluid ba 78 ne ka 78th Independence Day 2024, ka Lamlynti SHG Wahlakhiat ha ka 3 tarik Nailar 2024 ka la pynlong da ka jingpynïalehkai kynjat bol na ka bynta ki heprit.
Ïa katei ka lympung ïalehkai kynjat bol ba la pynlong ha madan ïalehkai jong ka shnong Wahlakhiat la ïashim bynta da phra tylli ki team ba kynthup ka Raisingstar SC, Ïatyllilang SC, Maitshaphrang FC, Nangkiew FC, Wahlakhiat SC, Youth Club Wahlakhiat FC, nangta ka Riwar Combined United bad ka Raid Mawlat S.C.
Ha ki jingïakhun, ki team kiba poi sha ka semifinal ki long ka Ïatyllilang SC, ka Maitshaphrang FC, ka Raisingstar SC bad ka Nangkiew FC. Katba ki team ba la poi ha ka phainal ki long hapdeng ka Nangkiew FC bad ka Maitshaphrang FC ha kaba ka Maitshaphrang FC ka la long ka jong da kaba pynliem da 3-0.
Ha kaba kut jong ka jingïalehkai la sam ïa ki khusnam lyngba da ki takma ba la sam da ki kongsan, ba kynthup u Bah Shanbor Manar uba la long kum u Kongsan bad u Bah Rishai Suting kum u Symbud Kongsan.
Ha katei ka sngi la ïadon lang ruh ki nongkitkam ka Lamlynti SHG Wahlakhiat bad kiwei kiwei.
