Ka CAA kam treikam ha Meghalaya ym don khar Bangladesh ba ïoh ban wan rieh tngen : Paul

Shillong, Nailar 13 : U Myntri sorkar bad nongpathai khubor ka MDA-2 u bah Paul Lyngdoh u la ong ba ka jylla Meghalaya ka la don lypa ka aiñ ban ïada ïa ka bad ka Citizenship Amendment Act (CAA) kan ym treikam satia ha ka jylla namar ka jylla ka la hap lypa hapoh ka 6 Schedule.
Haba kren sha ki lad pathai khubor u bah Paul u la ong kane ka aiñ kaba khlaiñ jongka Riti Synshar ka ri kata ka 6th Schedule ka la pynthikna ba ki jaka hapoh ka Meghalaya kin ym ngat ha ka CAA bad kumta ym don khar Bangladesh ba lah ban wan rieh tngen ne sah beaiñ hapoh u pud u sam ka Meghalaya.
“ Ngi sngewkmen eh ba ngi ïoh ka jingkyrshan ba pura na ka sorkar pdeng namar kat haduh mynta kam pat don kano kano ka jingïaleh ne ïa umsnam ha khappud Meghalaya bad ka Bangladesh. Ngi long kiba donbok tam ban don ha ka 6th Schedule kumta baroh kawei ka jylla kiba hap hapoh ka 6th schedule kin lait na ka CAA namar katei ka aiñ ka la ïada lypa ïa ki trai ri trai muluk”ong u bah Paul.
U la ong ba kane ka jinglait na kino kino ki jingïakajia ne jingïaumsnam ha khappud Meghalaya bad Bangladesh ka pynpaw ba ka sorkar pdeng ka ai ka jingkyrshan ba pura ïa ka jylla.
U la ong ba ka jingpynkhreh bad jingpynkhlaiñ pahara na ka sorkar jylla ruh ka biang bha khamtam da ka jingpynkhlaiñ biang ïakai VDP ban ïada na ka jingïoh wan rung tuh ki nong Bangladesh. Nalor kane ki Dorbar Shnong ryngkat bad ki Pulit ruh ki peitngor bad pyrkhing bha ïa ka jingpahara khnang ban lait na kino kino ki jingïoh wan rung beaiñ shapoh ka jylla.
“ Lada don kino kino kiba pyrshang ban sah beaiñ ha kino kino ki jaka ki la don lypa ki Dorbar Shnong ki ban ïeng pyrshah bad mynta ngi la rai ban pynkhlaiñ ïa ki VDP ha baroh kawei ka jylla khamtam ha khappud khnang ba kin ai ka jingïarap ïa ki bor pulit ha man la ki shong ki thaw” ong biang u bah Paul.
U la ïathuh ba ka sorkar jylla ka khlem shongthait hynrei ka ïai bud dien beit baroh 24×7 ïa ki jinglong jingman ha Bangladesh. Dei halor kane ba u Myntri Rangbah u Conrad K Sangma bad u Symbud Myntri Rangbah ba dei peit ïa ka tnad kam pohïing u bah Prestone Tynsong ki leit ïa kynduh ïa u myntri kam pohïing ka ri u Amit Shah ha nongbah Delhi ha ka Sngi Ba Ar ban ïakren bad pan shuh shuh ïa ki bor pahara ban nang pynkhlaiñ ïa ki jingpahara ha shi lynter ki bynta khappud Meghalaya bad ka Bangladesh.