Dei ka rynsan social media kaba la plie lad bad pynpaw nam ïa u heprit Samborlang, ong u Myntri Sports

Shillong, Nailar 13 : Da ka thong ban sei pyrthei ïa ka sap ba kyrpang kaba ki samla ïalehkai ka jylla ki don, u Myntri ka tnad Ïalehkai ka Jylla, Bah Shakliar Warjri ha ka sngi Ba-ar u la pynkup burom ïa u heprit Samborlang Rynjah ba dang 7 snem ka rta uba pynkhreh mynta ban leit pynïasoh noh bad ka Minerva Punjab, ka klob ïalehkai phutbol na ka jylla Punjab.
Haba kren sha ki lad pathai khubor hadien ka jingai khublei kitbok kitrwiang ïa u heprit Samborlang Rynjah ha shwa ba un mih na Shillong ban leit shah hikai ha ka Minerva Football Academy ha Punjab, u Bah Shakliar u la ong ba ka rynsan Social Media ka la ïarap bha lada nang ban pyndonkam ïa ka.
Kum ban shu kdew ba u heprit Samborlang u la pawnam ha ki bnai kiba la dep na ka video kaba pyni ïa ka jingtbit ap kol jong u bad la pynïasyriem ïa u kum u Emiliano Martinez, u rangapkol ka Ri Argentina kaba la rah ïa nam lahduh jong ka lympung ïalehkai phutbol World Cup 2022.
Kane ka video ka la khring ïa ki Club na shabar Jylla bad bar ri kumjuh bad mynta ka kynti u heprit Samborlang Rynjah u la ïoh ban soi ïa ka kontrak ba 10 snem bad Minerva Football Academy ha kaba un shah hikai nadong shadong.
“Ngi la ïa kynduh bad ki bahaïing, ki kur, ki hynmen u heprit Samborlang bad ngi sa tip ba kumno u poi sha ka bynta ban ïoh ïasoi bad ka Club ba pawnam ha ka Ri India,” la ong u Bah Shakliar uba la bynrap ba dei u hynmen jong u heprit Samborlang uba la pynlut por ban ring bad thep ïa ki video ap kol jong u para ha ki rynsan Social Media.
Ha kajuh ka por u la kyntu ba kumba ka la jia ïa u heprit Samborlang kumta ruh kane ka pateng kadei ban shim kabu ban pyndonkam ïa ki social media na ka bynta ka jingmyntoi kiba don jingmut. Shuh shuh u ong ruh ba ka tnad Sports ka don ïa ka bynta kaba khraw na ka bynta ban kyrshan ïa ki heprit kiba don ka sap ba kyrpang kum utei u heprit.
U Myntri u ong ruh ba kane ka lynti ïaid jong u heprit Samborlang kan long ka jingai mynsiem ïa kiwei pat ba kin trei minot ba kin ïoh kheit ïa u soh ka jingkyrmen bad ka jingsarong ïa ka ri Khasi Jaintia bad ïa ka jylla.