Ka krem Mawjymbuiñ kam dei satia ka jaka mane blei hynrei ka dei ka jaka jngohkai pyrthei: FKJGP

Mawsynram, ‘Nailar 08: Ka Federation of Khasi Jaiñtia & Garo Peoples (FKJGP) jong ka South Eastern Zone Mawsynram Block ka lah ïoh ban leit ïa kynduh ïa ki nongïalam ka Shnong jong ka shnong Mawsynram ha ryngkat ki dkhot ka Executive Dorbar Shnong ha ryngkat ka jingpynsngew ban kyrshan ïa ka jingpyrshah halor ka jingthmu ban pynlong jaka lehniam ki Hindu hapoh ka krem Mawjymbuiñ, Mawsynram, East Khasi Hills District.
Lah ban kdew ba ïa ka jingleit ban ïakynduh la ïalam da u Kyrmen Shangdiar kum u President bad u Running Kharbani kum General Secretary ka FKJGP South Eastern Zone, Mawsynram Block ha ryngkat kiwei de ki para dkhot.
Namarkata, ha ka jingleit ban ïakynduh bad jingïakren ka FKJGP ka la kyntu ïa ki para marjan shnong ban ai ka jingïatrelang bad kyntu ruh ïa ki shnong ban nym ai jaka ha ki lynti syngkien ïa ki ban sah kumjuh ka la kyntu ïa ka District Council ba kan shimkhia lem halor kane ka mat namar kan ktah ïa ka jinglong trai ïa ki jaka puka. Ymtang kata, katei ka jaka kam shym dei satia ka jaka mane blei hynrei ka dei ka jaka jngohkai pyrthei bad ha kaba na liang ka shnong bad ka seng kim pyrshah ban lehniam hynrei ki pyrshah ban pynlong jaka mane ïa ka jaka jngohkai ne tourist.
Ha ka shithi ba ka FKJGP South Eastern Zone, Mawsynram Block ka la phah sha ka shnong Mawsynram ka ong ba hadien ba na ka liang ka Dorbar Shnong Mawsynram ka la mih shakhmat lyngba ki lad pathai khubor ban pynpaw ïa ka jingpyrshah ïa ka jingwan ïaid “yatra” lane ïa ka jingwan lehniam jong ki Hindu ha ka krem Mawjymbuiñ, na ka liang ka FKJGP ka aikhublei ïa ka Dorbar Shnong baroh kawei kaba la ïeng skhem ha ka nongrim ban nym ailad ïa kum kine ki jingle namar kan sa ktah bad wanrah ruh ka jingma ïa ka shnong ka thaw, ïa ka dong ka thaiñ bad ruh ïa ka ri bad ka jaitbynriew.
Namarkata, Ka FKJGP ka ai ka jingkyrshan kaba pura ia ka shnong Mawsynram lyngba ka Dorbar Shnong halor kane ka mat, namar kumba ki tip paidbah ba katei ka jaka kam shym la long satia ka jaka lehniam jong ki Hindu hynrei ka dei kawei na ki jaka jngohkai pyrthei kaba la paw bha ha kane ka thaiñ Mawsynram bad ha ka jylla hi baroh kawei bad na ka liang ka Seng, ka kloi ban ïa shimbynta bad ka Dorbar Shnong ban pynpaw ïa ka jingpyrshah halor ka
jingwan lehniam jong ka niam Hindu ha katei ka jaka bad kin ïai don ryngkat bad ka Shnong ban pyrshah ïa kitei ki rukom leh namar lyngba ka jingwan jong ki kan sa pynsniew dur ïa ki jaka jngohkai pythei, kumjuh ïa ka imlang sahlang bad kan wanrah ruh ïa shibun ki jingeh bad ïa ka jingbym itynnad ha baroh ki liang ha ka imlang sahlang jong ka Bri U Hynñiew Trep.
Kyntang ïa wai ka FKJGP ka kyrpad ïa ka Dorbar Shnong ban ïeng skhem ha ka nongrim kaba ki la shim ïa ka rai bad da ka jinglah jong ka Dorbar Shnong ban pyrshah ka pyni ïa ka dak jong ka jinglong trai ha la ka jong ka jaka kum ki trai ri trai muluk bad ka lynti ban ïada ïa la ka jong ka jaka, ïa ka ri bad ka jaidbynriew.