Ka jingïoh jong ka jylla kum kawei na ki jaka ban pynlong ïa ka lympung lympung ïalehkai jong ka Durand Cup ka la pynshongshit biang sa shisien ïa ka mynsiem ieit phuborl ki nongshong shnong ha Meghalaya. Ka jingïoh rung haduh ar tylli ki kynhun, kata ka Shillong Lajong bad ka Rangdajied United FC na kane ka jylla kaba rit ka la nang pynshongshit shuh shuh ïa ki paidbah ba ju smat bad ju ieid ïa kane ka jait jingïalehkai kaba man la ki khynnah rit haduh ki rangbah ki nang lut ban ïalehkai.
Tiak lada phai dien sha kito ki snem ba dang shongshit bha ka lympung ïalehkai I-League ki paidbah ki tuid sha madan Polo da ki hajar hajar ngut ban sakhi ïa ki jingïalehkai. Hynrei kane ka mynsiem jingkyrshan ka la nang hiar bad nang tlor nang tlor katba nang mih ki snem. Ka daw lehse kadei namar ha ka thup ki nongïalehkai la kham bun kiwei ki jaidbynriew ba wan na kiwei ki jylla ban ïa ki lajong. Kane ka rukom pyrkhat lehse ha kawei ka liang dei ban ïaroh ïa ka rukom pyrkhat u Khasi naba u kwah ban ïohi ba ka Jaidbynriew bad ki nongshong shnong na kane ka jylla hi ba ki dei ban rung ha ka thup ba nyngkong. Tangba ha kawei pat ka liang ka klob ruh ka hap ban pyrkhat bad bud lang ïa ki kyndon jong ki bor pynïaid ban shim ïa ki nongïalehkai na shabar bad wat na shabar ri ruh kumjuh ban pynkhlain ïa ka kynhun da ka thong ba kin ïoh rah ïa ka jingjop.
Ka jingwanrah ïa ki rangïalehkai ba kynsai na kiwei pat ki ri ka pyrthei ym tang ba ka nang pynshongshit ïa ka lympung hynrei ka ïarap ruh ïa ki samla ka jylla bad ka Ri ba kin ïoh ïa ka kabu ksiar ban ia tynjuh met bad pyndei tyrpeng lang. Kane kan ïarap ruh ïa ki ban tip ba haduh katno ka kyrdan ki la poi ka bor ïalehkai. Kumta, ha kum kane ka por dei ban ai ka burom ïa ka Durand Cup kaba la kylla long kum ka kabu ksiar ïa kiba bun ki samla na ka jylla ban mih madan. La ïohi ruh ba ka Shillong Lajong bad khamtam ka Rangdajied United FC ki la sei kham bun ki samla na ka jylla bad kane hi kadei ka dawbah kaba pynlong ïa ki nongpeitkai ban tuid bad sakhi markhmat ban ïohi ïa ka sap ba kyrpang ba ki samla na kane ka jylla ki don.
Lah ruh ban ong ba ka rukom ïalehkai ki samla na kane ka jylla ki la ïa ryngkat ka rukom ïalehkai kumba long lem kiwei ki samla ba la paw ha ka ri India. Ka jingïakhun hapdeng ka Shillong Lajong bad ka Nepal Army ka la nang pynsakhi bad pynskhem shuh shuh ïa ka jingtbit ki samla trai jylla ha kane ka lympung. Kaba kham pynkmen eh ïa ki nongkyrshan ka long ba ki ïohi ba dei ki samla na ka Jylla kiba ïoh ban pynkhih jar ha kitei ki lympung.
Lada phai pat sha ka jingïakhun hapdeng ka Rangdajied United FC bad FC Goa lah ban ong ba kadei kawei na ki jingïakhun kaba da pynshongshit shisha ïa ki nongpeitkai, kata ruh hapdeng u slap ki shong beit ban peit. Kane ka kynhun kaba la wan ban shim bynta da kaba ïoh por tang khyndïat sngi hadien ba ka Hyderabad ka weng noh ïalade na ka lympung ka la lah pat ban ïoh ïa ka jingieid jong ki paidbah khamtam haba ka pyni ïa ka jinglah jongki ban ïalehkai bha.
Kiba bun hi ki kren ba kum ka kynhun kaba don bun ki khynnah kiba dang khie samla ki khlem poi pyrkhat satia ba kan ïoh ban thep haduh 3 kol ïa ka FC Goa kaba dei kawei na ki kynhun ba khlainbor bad kaba pawnam ha ki lympung ïalehkai jong ka Indian Super League ha ka Ri. Nalorkata, ka rukom ïalehkai jong ki, watla ki shah rem noh da 4-3 kol pynban ka pynartatien lypa ïa kiwei pat ki kynhun kiba ka hap ban kynduh aireng ha ki ar tylli kiwei pat ki jingïakhun, kata sa ïa ka Nepal Army bad sa ïa ka Shillong Lajong. Lehse lada ka long shisha kumne, ka phutbol ha ka Jylla kan nang kiew arted khamtam lada ka sorkar jylla kumba la pynbna da u Myntri Rangbah ban kyrshan haduh 3klur tyngka ïa ki klob kiba poi aireng ha ki kyrdan kiba kham shajrong kum ka I-League bad kiwei kiwei.
