Shillong, Nailar 08: Ki thei ïalehkai phutbol ka jylla Meghalaya ki la jam mynta sha ka wat ïakhun Quarter final ha ka lympung U-17 girls’ Subroto Cup 2024, bad kane la pynthikna hadien ba ka la pynbam kput haduh shi dorjon ïa ka Punjab, kata 12-0 kol ha ka jingïalehkai na ka Pool D ha Gurgaon, ha ka Sngi Palei.
Kane ka dei ka namjop kaba lai sien lynter ïa ki thei ïalehkai ka Jylla hadien ba ki la pynliem ïa ka Maharashtra ha ka Sngi Balang bad ïa ka Indian Public Schools Conference ha ka sngi ïakhun ba nyngkong.
Kumban shu pynkynmaw, ka Christian Higher Secondary School kaba na Ri-Bhoi District ka dei ka skul kaba la ïoh ban mihkhmat ïa ka jylla mynta ka kynti, hadien ba ka la rah ïa ka State level Subroto Cup ha u bnai ba ladep.
Haba phai sha ka jingïakhun hynne ka Sngi Palei, la sakhi ïa ka jingtbit jong ka Pynibha Rangthaluh kaba la kynjoh ar tylli ki hat trik naba pynkhihjar haduh 7 kol; kumban shu kdew, ka la thep 6 kol pyrshah ïa ka IPSC, kaba la kyntiew mynta 13 kol ïa ka naduh ba sdang kane ka lympung.
Nangta kiwei pat kiba la ïoh pynkhihjar ha kane ka sngi pyrshah ïa ka Punjab ki kynthup ïa ka Susimery Lyngdoh Peinlang, Rimika Khongkai, Daiamon Makhroh, Evamary Myrthong bad ka Barikor Kurbah.
Lah ban kdew ba ka jingïakhun ïa ka quarterfinal kan long ka jingïakhun kaba pher bad kaba jwat, naba ka jylla kan aireng pyrshah ïa ka Manipur, ka kynhun kaba khlaiñbor ha ki lympung kynjatbol ki kynthei.
Baroh saw tylli ki jingïakhun quarterfinal yn pynlong la Sngi Saitjaiñ ha Ambedkar Stadium kaba ha New Delhi, ka Meghalaya kan ïalehkai ha ka por 5 baje nohphaisngi.
