Shillong, Naitung 29: U Dr. Ricky AJ Syngkon, MP jong ka Shillong, u la ai da ka jingthoh sha u Vice Chancellor ka NEHU, u Prof. PS Shukla ha kaba ïadei bad ka thungkam thungjam ha kane ka skul bah kaba don ha Shillong.
Da kaba pynkynmaw ba ïa ka NEHU la seng na ka bynta ka jingmyntoi jong ki trai ri trai muluk ka thaiñ shatei lammingi bad mynta na ka bynta ka jylla Meghalaya, namar ba kiwei ki jylla ki la don la ki jong ki University, u MP u la ong ba ha ka liang ka thungkam thungjam, la ka long ki nonghikai ne ki nongtrei, dei ban thung shuwa ïa ki trai ri trai muluk, ha kaba wat ha ka kam hikai ruh ki la bun ki trai shnong kiba la lah ban hikai ne kiba la long qualified.
Nangta ha ka jingthungkam ha ki non teaching staff dei ban bud pynlong beit da ka internal eksam ne pynïaid beit da ka NEHU bad ym donkam ban bud ne pyndonkam ïa ki rukom thungkam ka sorkar pdeng ne ki bor pynïaid ka sorkar, namar kiwei ki jylla ruh ki la leh kumjuh.
Ha kaba ïadei bad ka rukom pynïaid ïa ka NEHU, u VC udei ban pynïaid beit ne bud pyrkhing katkum ki kyndon ne ki jingtreikam kiba don ha ka University. Kam dei ba ka bor uwei u briew un long ha khlieh ïa ka University bad u MP u la ong ruh ïa u VC ba kum u khlieh ka University kadei ka kamram jong u ban peit ba ki kyndon treikam kidei ban ïaid beit ïaid ryntih.
Shuh shuh u MP u la ong ruh ba u la ïoh jingtip ba ki don bun ki Samla trai jylla kiba kwah ban wai ïa ki dukan ha phyllaw jong ka University, hynrei haduh mynta kim shym la ïoh jingïarap eiei na ka Univesity.
Kumta u kyntu ïa u VC ba un peit ïa kine ki mar kiba la wanrah ne kdew hakhmat jong u.
